Tattha ādimajjhagāthāpariyosānanti gāthāya ādimajjhapariyosānaṃ viditvā. Laddhā khaṇanti okāsaṃ labhitvā. Icchati manti maṃ esā icchatītipi puriso itthīnaṃ na vissaseyya. Sākhapurāṇasanthatanti hiyyo vā pure vā santhataṃ purāṇasākhasanthataṃ na vissase apappoṭhetvā apaccavekkhitvā na paribhuñjeyya. Tattha hi dīghajātiko vā pavisitvā tiṭṭheyya paccāmitto vā satthaṃ nikkhipeyya. Mittapurāṇacoranti panthadubbhanaṭṭhāne ṭhitacoraṃ porāṇamitto meti na vissase. Corā hi ye te sañjānanti teyeva mārenti. Sakhā mamanti so hi khippameva kujjhati tasmā rājānaṃ sakhā meti na vissase. Dasanna mātaranti ayaṃ mahallikā idāni na aticarissati attānaṃ rakkhissatīti na vissāsitabbā. Rāmakarāsūti bālānaṃ ratikārāsu. Accantasīlāsūti atikkantasīlāsu. Accantapemānugatassāti sacepi accantaṃ anugatapemā assa tathāpi taṃ na vissase kiṃkāraṇā titthasamā hi nāriyoti sambandho titthaṃ viya sabbasādhāraṇāti attho. Haneyyunti kuddhā vā aññaṃ purisaṃ sārattā vā hutvā sabbametaṃ hananādiṃ kareyyuṃ. Mā dīnakāmāsūti hīnajjhāsayāsu. Bhāvanti evarūpāsu sinehaṃ mā kareyya. Gaṅgatitthūpamāsūti sabbasādhāraṇaṭṭhena gaṅgātitthasadisāsu. Musāti musāvādo tāsaṃ saccasadisova. Gatenāti ādīsu pekkhitena palobhena ummādantījātakaṃ dunnivatthena naḷinikājātakaṃ mañjunā bhaṇitena tuvaṭṭaṃ kho ayyaputtaka āgaccheyyāsīti nandattherassa vatthu kathetabbaṃ. Coriyoti sambhatassa dhanassa vināsanena coriyo. Kaṭhināti thaddhahadayā. Bāḷāti duṭṭhā appakeneva kujjhanasīlā. Lapanasakkharāti niratthakalapanena sakkharā viya madhurā. Asāti asatiyo lāmakā. Sārattāti sabbadā sārattā. Pagabbhāti kāyapāgabbhiyādīhi pagabbhā. Yathāti yathā sikhī sabbaghaso evaṃ tāpi sabbaghasā. Paliveṭhentīti parisajjanti upagūhanti veṭhenti. Latāvāti yathā latā rukkhaṃ veṭhenti evametā purisaṃ parisajjantiyopi dhanaṃ parisajjanti nāma. Hatthibandhanti hatthibandhādīsu gopuriso vuccati Gopālako. Chavadāhakanti chavānaṃ dāhakaṃ susānagopakanti vuttaṃ hoti. Pupphachaḍḍakanti vaccaṭṭhānasodhakaṃ. Sadhananti etesupi sadhanaṃ anugacchantiyeva. Akiñcinanti adhanaṃ. Chavakasamaṃ sadisanti sunakhamaṃsakhādakacaṇḍālena sadisaṃ. Tena nibbisesaṃpi purisaṃ gacchanti bhajanti tasmā anupatanti dhanahetu nāriyo.