Abhipārakassapi ārocayiṃsu sāmi rājā nagaraṃ padakkhiṇaṃ karonto tumhākaṃ gharadvāraṃ patvā nivattitvā pāsādaṃ abhiruhatīti. So attano gehaṃ gantvā ummādantiṃ amantetvā bhadde kacci rañño attānaṃ dassesīti pucchati. Sāmi eko mahodaro mahādāṭhiko rathe ṭhatvā āgato puriso atthi ahaṃ taṃ rājā vā arājā vāti na jānāmi eko issaroti pana vutte vātapāne ṭhatvā pupphāni khipiṃ so tāvadeva ṭhatvā nivattetvā gatoti. So taṃ sutvā nāsitomhi tayāti punadivase pātova rājanivesanaṃ āruyha sirigabbhadvāre ṭhatvā rañño ummādantiṃ nissāya vilāpaṃ sutvā ayaṃ ummādantiyā paṭibaddhacitto jāto taṃ alabhanto marissati rañño ca mamañca aguṇaṃ mocetvā imassa mayā jīvitaṃ dātuṃ vaṭṭatīti attano nivesanaṃ gantvā ekaṃ daḷhamittaṃ upaṭṭhākaṃ pakkosāpetvā tāta asukaṭṭhāne susiracetiyarukkho atthi tvaṃ kañci ajānāpetvā atthaṅgate suriye tattha gantvā antorukkhe Nisīda ahaṃ tattha balikammaṃ karonto taṃ ṭhānaṃ patvā devatā namassanto sāmi devarāja amhākaṃ rājā nagaramhi chaṇe vattamāne akīḷitvāva sirigabbhaṃ pavisitvā vippalapanto nipanno mayaṃ tattha kāraṇaṃ na jānāma rājā devatānaṃ bahūpakāro anusaṃvaccharaṃ sahassaṃ visajjetvā balikammaṃ kāreti imaṃ nāma nissāya rājā vippalapatīti ācikkhatha rañño no jīvitadānaṃ dethāti yācissāmi tvaṃ tasmiṃ khaṇe saraṃ parivattetvā senāpati tumhākaṃ rañño byādhi nāma natthi so pana tava bhariyāya ummādantiyā paṭibaddhacitto sace taṃ labhissati jīvissati no ce marissati sace tassa jīvitaṃ icchasi ummādantimassa dehīti vadeyyāsīti evaṃ taṃ uggaṇhāpetvā uyyojesi. So gantvā tasmiṃ rukkhe nisīdi. Punadivase senāpati taṃ ṭhānaṃ gantvā āyāci. So tathā akāsi. Senāpati sādhūti vatvā devataṃ vanditvā amacce jānāpetvā nagaraṃ pavisitvā rājanivesanaṃ āruyha sirigabbhadvāraṃ ākoṭṭesi. Rājāpi satiṃ upaṭṭhapetvā ko esoti pucchi. Ahaṃ deva abhipārakoti. Athassa rājā dvāraṃ vivari. So pavisitvā rājānaṃ vanditvā gāthamāha