Tadā eko sampannavibhavo brāhmaṇo pañcahi sakaṭasatehi vohāraṃ karonto pubbantato aparantaṃ sañcarati. So cintesi porisādo nāma kira coro magge manusse māreti dhanaṃ datvā taṃ aṭaviṃ atikkamissāmīti. So aṭavimukhavāsīnaṃ manussānaṃ maṃ aṭaviṃ atikkamethāti sahassaṃ datvā tehi saddhiṃ maggaṃ paṭipajji. Gacchanto ca sabbasatthaṃ purato katvā sunahātānulitto sabbālaṅkārapaṭimaṇḍito setagoṇayutte sukhayānake nisinno tehi Ativāhikapurisehi parivuto sabbapacchato agamāsi. Tasmiṃ khaṇe porisādo rukkhaṃ āruyha purise upadhārento sesamanussesu kiṃ imesu khāditabbaṃ atthīti vigatacchando hutvā brāhmaṇaṃ diṭṭhakālato paṭṭhāya taṃ khāditukāmatāya paggharitakheḷo ahosi. So tasmiṃ attano santikaṃ āgate rukkhā oruyha ahaṃ hare coro porisādoti tikkhattuṃ nāmaṃ sāvetvā khaggaṃ parivattento vālukāya tesaṃ manussānaṃ akkhīni pūrento viya pakkhandi. Ekopi saṇṭhāretuṃ samattho nāma nāhosi. Sabbe bhūmiyaṃ urena nipajjiṃsu. So sukhayānake nisinnaṃ brāhmaṇaṃ pāde gahetvā piṭṭhiyaṃ adhosīsakaṃ olambetvā sīsaṃ gopphakehi paharanto ukkhipitvā pāyāsi. Purisā uṭṭhāya bho tassa mayaṃ brāhmaṇassa hatthato kahāpaṇasahassaṃ gaṇhimhā ko nāma amhākaṃ purisakāro sakkonto vā asakkonto vā thokaṃ anubandhāmāti taṃ anubandhiṃsu. Porisādopi nivattitvā olokento kañci adisvā sanikaṃ pāyāsi. Tasmiṃ khaṇe eko thāmasampanno sūrapuriso vegena anubandhitvā taṃ sampāpuṇi. So taṃ disvā ekaṃ vatiṃ laṅghanto khadirakhāṇukaṃ atikkami. Khāṇuko piṭṭhipādena nikkhami. So lohitena paggharantena khañjiyamāno pāyāsi. Atha naṃ so puriso disvā bho mayā esa viddho kevalaṃ tumhe pacchato etha gaṇhissāma nanti āha. Te dubbalabhāvaṃ ñatvā taṃ anubandhiṃsu. So tehi anubandhabhāvaṃ ñatvā brāhmaṇaṃ visajjetvā attānaṃ sotthimakāsi. Ativāhikapurisā brāhmaṇassa laddhakālato paṭṭhāya kiṃ amhākaṃ corenāti tatova nivattiṃsu. Porisādopi attano nigrodhamūlaṃ gantvā pārohabbhantaraṃ pavisitvā nipanno ayye rukkhadevate sace me sattāhabbhantareyeva vaṇaṃ phāsukaṃ kātuṃ sakkhissasi sakalajambūdīpe ekasatakhattiyānaṃ galalohitena tava khandhaṃ dhovitvā antehi parikkhipāpetvā pañcamadhuramaṃsena balikammaṃ karissāmīti āyācanaṃ akāsi. Tassa pana maṃsañca annapānañca alabhantassa sarīraṃ sussi. Antosattāheyeva vaṇo phāsuko ahosi. So devatānubhāvena tassa phāsukabhāvaṃ sallakkhesi. So katipāhaṃ manussamaṃsaṃ khāditvā balaṃ labhitvā evaṃ cintesi bahūpakārā me devatā āyācanamassā muñcissāmīti. So khaggaṃ ādāya rukkhamūlato nikkhamitvā rājāno ānessāmīti pāyāsi.