Atha naṃ purimabhave yakkhakāle ekato manussamaṃsakhādako sahāyako yakkho anuvicaranto disvā ayaṃ mama atītabhave sahāyoti ñatvā samma maṃ sañjānāsīti pucchi. Na sañjānāmi sammāti. Athassa purimabhave yakkhakāle katakāraṇaṃ kathesi. So taṃ sañjānitvā paṭisanthāramakāsi. Kahaṃ nibbattosīti yakkhena puṭṭho nibbattaṭṭhānañca raṭṭhā pabbājanīyakāraṇañca idāni vasanaṭṭhānañca khāṇunā viddhakāraṇañca devatāya āyācanā mocanatthaṃ gamanakāraṇañca sabbaṃ ārocetvā samma tayāpi mametaṃ kiccaṃ nittharitabbaṃ ubhopi mayaṃ gacchāma sammāti āha. Samma na gacchāmi ekaṃ pana me Kammaṃ atthi ahaṃ kho pana anagghaṃ padalakkhaṇaṃ nāma mantaṃ jānāmi so balañca javañca tejussadañca karoti taṃ mantaṃ gaṇhāhīti. So sādhūti sampaṭicchi. Yakkhopissa taṃ datvā pakkāmi. Porisādo mantaṃ uggahetvā tato paṭṭhāya vātajavo atisūro mahābalaparakkamo ahosi. So sattāhabbhantareyeva ekasatarājāno uyyānādīni gacchante disvā vātavegena pakkhanditvā nāmaṃ sāvetvā vagganto nadanto bhayappatte katvā pāde gahetvā adhosire katvā paṇhiyā sīsaṃ paharanto vātavegena netvā hatthatalesu chiddāni katvā rajjuyā nigrodharukkhe olambesi. Aggapādaṅgulīhi bhūmiyaṃ phusamānāhi atha te sabbe rājāno vāte paharante milātakoraṇḍakadāmāni viya parivattentā olambiṃsu. Sutasomo mama piṭṭhācariyo hoti sace gaṇhissāmi sakalajambūdīpo tuccho bhavissatīti taṃ na nesi. Sohaṃ balikammaṃ karissāmīti aggiṃ katvā sūle tacchento nisīdi. Rukkhadevatā taṃ kiriyaṃ disvā mayhaṃ kiresa balikammaṃ karoti vaṇepissa mayā kiñci phāsukaṃ kataṃ natthi idāni taṃ imesaṃ mahāvināsaṃ karissati kinnu kho kattabbanti cintetvā ahametaṃ nivāretuṃ na sakkhissāmīti catunnaṃ mahārājānaṃ santikaṃ gantvā tamatthaṃ kathetvā nivāretha nanti āha. Tehipi na mayaṃ porisādaṃ nivāretuṃ sakkhissāmāti vutte sakkaṃ upasaṅkamitvā tamatthaṃ kathetvā nivāretha nanti āha. Sopi nāhaṃ sakkomi nivāretuṃ ekamatthaṃ pana ācikkhissāmīti vatvā ko nāmāti vutte Sadevake loke sadiso añño natthi kururaṭṭhe pana indapattanagare korabyarājaputto sutasomo nāma taṃ nibbisevanaṃ katvā damessati rājūnañca jīvitaṃ dassati tañca manussamaṃsaṃ khādanato oramāpessati sakalajambūdīpe amataṃ viya abhisiñcissati sacepi rājūnaṃ jīvitaṃ dātukāmo sutasomaṃ ānetvā balikammaṃ kātuṃ vaṭṭatīti vadehīti. Sā sādhūti sampaṭicchitvā khippaṃ āgantvā pabbajitavesena tassa avidūre pāyāsi. So pana padasaddena rājā nukho koci palāto bhavissatīti olokento taṃ disvā pabbajitā nāma khattiyāva imaṃ gahetvā ekasataṃ pūretvā balikammaṃ karissāmīti uṭṭhāya asihattho anubandhi tiyojanaṃ anubandhitvāpi pāpuṇituṃ nāsakkhi. Gatte hi sedā muñciṃsu. So cintesi ahaṃ pubbe hatthiṃpi assaṃpi rathaṃpi dhāvantaṃ anubandhitvā gaṇhāmi ajja imaṃ pabbajitaṃ sakāya pakatiyā gacchantaṃ sabbathāmeneva dhāvantopi gaṇhituṃ na sakkomi kinnu kho kāraṇanti. Tato so pabbajito nāma vacanakaro hoti tiṭṭhāti naṃ vatvā ṭhitaṃ gaṇhissāmīti cintetvā tiṭṭha samaṇāti āha. Ahaṃ tāva ṭhito tvaṃ pana ṭhātuṃ vāyāmaṃ karosīti. Atha naṃ bho pabbajitā nāma jīvitahetupi alikaṃ na bhaṇanti tvaṃ pana musā kathesīti vatvā gāthamāha