Evañca pana vatvā devatā pabbajitavesaṃ antaradhāpetvā sakeneva vaṇṇena ākāse suriyo viya jajjalamānā aṭṭhāsi. So tassa kathaṃ sutvā rūpañca oloketvā kāsi tvanti āha. Ahaṃ imasmiṃ rukkhe nibbattadevatāti. So diṭṭhā me attanā devatāti tussitvā sāmi devarāja mā sutasomassa kāraṇā cintayi attano rukkhaṃ pavisāhīti. Atha devatā tassa passantasseva rukkhaṃ pāvisi. Tasmiṃ khaṇe suriyo atthaṅgato cando uggato. Porisādo vedaṅgakusalo nakkhattacāraṃ jānāti. So nabhaṃ oloketvā sve phussanakkhattaṃ bhavissati sutasomo nahāyituṃ uyyānaṃ gamissati tattha naṃ gaṇhissāmi ārakkho panassa mahā bhavissati samantā tiyojanaṃ sakalanagaravāsino rakkhantā vicarissanti asaṃvidahite ārakkhe paṭhamayāmeyeva migāciravanuyyānaṃ gantvā maṅgalapokkharaṇiṃ otaritvā vasissāmīti cintetvā tattha gantvā pokkharaṇiṃ oruyha paduminipattena sīsaṃ paṭicchādetvā aṭṭhāsi. Tassa tejena macchakacchapādayo osakkitvā udakapariyante vaggavaggā hutvā vicariṃsu. Kuto pana laddhāyaṃ tejoti. Pubbayogavasena. So hi kassapadasabalassa kāle khīrasalākabhattaṃ paṭṭhapesi. Tena mahāthāmo ahosi. Aggisālaṃ kāretvā bhikkhusaṅghassa sītavinodanatthaṃ aggiñca dārūni ca dārucchedanavāsiñca pharasuñca adāsi. Tena tejavā ahosi. Evaṃ tasmiṃ antouyyānaṃ gateyeva balavapaccūsakāle samantā tiyojane ārakkhaṃ gaṇhiṃsu. Rājāpi pātova bhuttapātarāso alaṅkatahatthikhandhavaragato caturaṅginiyā senāya parivuto nagarato nikkhami.

Tadā takkasilato nando nāma brāhmaṇo catasso satārahā gāthāyo ādāya vīsatiyojanasatikaṃ maggaṃ atikkamma taṃ nagaraṃ patvā dvāragāme vasitvā suriye uggate nagaraṃ pavisanto rājānaṃ pācīnadvāre nikkhamantaṃ disvā hatthaṃ pasāretvā jayāpesi. Rājā disācakkhuko hutvā gacchanto unnatappadese ṭhitassa brāhmaṇassa pasāritahatthaṃ disvā hatthināgaṃ pesetvā brāhmaṇaṃ upasaṅkamitvā pucchanto gāthamāha

kismiṃ nu raṭṭhe vata jātibhūmi