Taṃ sutvā mahāsatto saphalaṃ vata me āgamananti tuṭṭhacitto hutvā imā gāthā neva sāvakabhāsitā na isibhāsitā na kavibhāsitā sabbaññubhāsitā kiṃ nukho agghantīti cintetvā imāsaṃ sakalaṃpi cakkavāḷaṃ yāva brahmalokā sattaratanaparipuṇṇaṃ katvā dadamāno neva anucchavikaṃ kātuṃ sakkoti ahaṃ panassa tiyojanasate kururaṭṭhe sattayojanike indapattanagare rajjaṃ dātuṃ pahomi atthi nukhvassa rajjaṃ kātuṃ bhāgyanti aṅgavijjānubhāvena olokento nāddasa tato senāpatiṭṭhānādīni olokento ekagāmabhojakassāpi bhāgyaṃ adisvā dhanalābhassa olokento koṭidhanato paṭṭhāya oloketvā catunnaṃyeva kahāpaṇasahassānaṃ bhāgyaṃ disvā ettakena naṃ pūjessāmīti catasso sahassatthavikā dāpetvā ācariya tumhe aññesaṃ khattiyānaṃ imā gāthā desetvā kittakaṃ dhanaṃ labhitthāti pucchi. Ekekāya Sataṃ sataṃ mahārājāti teneva satārahā gāthā nāma jātāti. Atha naṃ mahāsatto ācariya tvaṃ attano gahetvā vicaraṇabhaṇḍassa agghaṃ na jānāsi ito paṭṭhāya etā gāthā sahassārahā nāma hontūti vatvā gāthamāha

sahassiyo imā gāthā nayimā gāthā satārahā

cattāri tvaṃ sahassāni khippaṃ gaṇhāhi brāhmaṇāti.

Athassa ekaṃ sukhayānakaṃ datvā brāhmaṇaṃ sotthinā gehaṃ sampāpethāti purise āṇāpetvā taṃ uyyojesi. Tasmiṃ khaṇe sutasomaraññā satārahā gāthā sahassārahā katvā pūjitā sādhu sādhūti mahāsādhukārasaddo ahosi. Tassa mātāpitaro taṃ saddaṃ sutvā kiṃsaddo nāmesoti pucchitvā yathābhūtaṃ sutvā dhanalobhatāya mahāsattassa kujjhiṃsu. Sopi brāhmaṇaṃ uyyojetvā tesaṃ santikaṃ gantvā vanditvā aṭṭhāsi. Athassa pitā kathaṃ tāta evarūpassa sāhasikassa corassa hatthato muttosīti paṭisanthāramattaṃpi akatvā attano dhanalobhatāya saccaṃ kira tāta tayā catasso gāthā sutvā cattāri sahassāni dinnānīti pucchitvā saccanti vutte āha