Bodhisatto taṃ rattiṃ nivesaneyeva vasitvā punadivase pātova aruṇuggamanavelāya mātāpitaro vanditvā āpucchitvā sesajanaṃ anusāsetvā assumukhena nānappakāraṃ paridevantena itthāgārādi- mahājanena anugato nagarā nikkhamitvā taṃ janaṃ parivattetuṃ asakkonto mahāmagge daṇḍakena tiriyaṃ lekhaṃ katvā sace mayi sineho atthi imaṃ mā atikkamathāti āha. Mahājano sīlavato tejavantassa āṇaṃ atikkamituṃ asakkonto mahāsaddena paridevamāno taṃ sīhavijambhitena gacchantaṃ oloketvā tasmiṃ mahāsatte dassanūpacāraṃ atikkante ekaravaṃ ravanto nagaraṃ pāvisi. Sopi āgatamaggeneva tassa santikaṃ gato. Tena vuttaṃ agamāsi so yattha porisādoti. Dhammassavanakaṇḍaṃ niṭṭhitaṃ.

Bodhisattassa gatakālato paṭṭhāya porisādo cintesi sace mama sahāyo sutasomo āgantukāmo āgacchatu anāgantukāmo mā āgacchatu rukkhadevatā yaṃ mayhaṃ icchati taṃ karotu ime rājāno māretvā pañcamadhuramaṃsena balikammaṃ karissāmīti. Citakaṃ katvā aggiṃ jāletvā aṅgārā tāva hontūti tassa sūle tacchantassa nisinnakāle bodhisatto tassa santikaṃ gato. Atha naṃ porisādo disvā tuṭṭhacitto samma gantvā kattabbakiccante katanti pucchi. Mahāsatto āma mahārāja kassapadasabalena Desitā me gāthā sutā dhammakathikasakkāro ca kato tasmā gantvā kattabbakiccaṃ kataṃ nāma hotīti dassento gāthamāha

kato mayā saṅgaro brāhmaṇena

raṭṭhe sake issariye ṭhitena