Iti mahāsatto tesaṃ paṭiññaṃ gahetvā porisādaṃ pakkositvā ehi samma khattiye mocehīti āha. So khaggaṃ gahetvā ekassa rañño bandhanaṃ chindi. Rājā sattāhaṃ nirāhāro hutvā vedanāppatto saha bandhanacchedā mutto bhūmiyaṃ patati. Taṃ disvā mahāsatto kāruññaṃ katvā samma porisāda mā evaṃ chindāhi ekaṃ rājānaṃ ubhopi daḷhaṃ gahetvā ure katvā idāni bandhanaṃ chindāmāti āha. Porisādo khaggena chindi. Mahāsatto thāmasampannatāya taṃ ure nipajjāpetvā orasaputtaṃ viya muducittena otāretvā bhūmiyaṃ nipajjāpesi. Evaṃpi te sabbe bhūmiyaṃ nipajjāpetvā vaṇe dhovitvā dārakānaṃ kaṇṇato suttakaṃ viya sanikaṃ rajjuyo Nikkaḍḍhitvā pubbalohitaṃ dhovitvā vaṇe niddose katvā samma porisāda etaṃ rukkhatacaṃ pāsāṇe ghaṃsitvā āharathāti āharāpetvā saccakiriyaṃ katvā tesaṃ hatthatalesu makkhesi. Taṃ khaṇaññeva phāsukaṃ ahosi. Porisādo taṇḍulaṃ gahetvā vāraṇaṃ paci. Ubhopi janā parosataṃ khattiye vāraṇaṃ pāyesuṃ.
Iti te sabbeva santappitā suriyo atthaṅgato. Punadivasepi pāto ca majjhantike ca sāyaṇhe ca vāraṇameva pāyetvā tatiyadivase sasitthakaṃ yāguṃ pāyesuṃ. Yāvatā te arogā ahesuṃ. Atha ne mahāsatto gantuṃ sakkhissathāti pucchitvā gacchāmāti vutte ehi samma porisāda sakaṃ raṭṭhaṃ gacchāmāti āha. Sutvā so rodamāno tassa pādesu patitvā tvaṃ samma rājāno gahetvā gaccha ahaṃ idheva vanamūlaphalāni khādanto vasissāmīti āha. Samma idha kiṃ karissasi samma ramaṇīyante raṭṭhaṃ bārāṇasiyaṃ rajjaṃ kārehīti. Samma kiṃ kathesi na sakkā mayā tattha gantuṃ sakalanagaravāsino hi me verino te mayhaṃ iminā mātā khāditā mayhaṃ pitāti maṃ paribhāsissanti gaṇhatha imaṃ coranti ete daṇḍena vā leḍḍunā vā muggarena vā sattiyā vā pharasunā vā maṃ jīvitā voropessanti ahañca tumhākaṃ santike sīlesu patiṭṭhito jīvitahetupi na sakkā mayā paraṃ māretuṃ tasmā nāhaṃ gacchāmi ahaṃ manussamaṃsato virahitattā kittakaṃ jīvissāmi idāni mama tumhākaṃ dassanaṃ natthīti roditvā gacchatha tumheti āha. Atha mahāsatto Tassa piṭṭhiṃ parimajjitvā samma porisāda sutasomo nāmāhaṃ mayā tādiso kakkhalo pharuso sāhasiko vinīto bārāṇasivāsikesu janesu kiṃ atthi ahaṃ taṃ tattha patiṭṭhāpessāmi asakkonto attano rajjaṃ dvidhā bhinditvā tava dassāmīti tumhākaṃpi nagare mama verino atthiyevāti vutte iminā mama vacanaṃ karontena dukkaraṃ kataṃ yena kenaci upāyena porāṇakayase patiṭṭhāpetabbo esa mayāti cintetvā tassa palobhanatthāya nagarasampattiṃ vaṇṇento āha