Tattha sukatanti nānappakārehi suṭṭhu kataṃ. Suniṭṭhitanti nānāsambhārayojanena suṭṭhu niṭṭhitaṃ. Kathaṃ eko ramasīti mūlaphalādīni khādanto kathaṃ ramissasi ehi mahārāja gamissāmāti. Vellivilākamajjhāti ettha vellīti rāsi vilākamajjhāti vilaggamajjhā uttattaghanasuvaṇṇarāsipabhā ceva tanudīghamajjhā cāti. Devesūti devaloke accharā indaṃ viya ramaṇīye bārāṇasinagare pubbe pamodayiṃsu tā hitvā idha kiṃ karissasi ehi samma gacchāmāti. Tambūpadhāneti rattūpadhāne. Sabbasayanamhīti sabbattharaṇatthate sayane. Alaṅkateti anekabhūmikā dassetvā addharattālaṅkatayutte tattha tuvaṃ pubbe sayīti attho. Sukhanti tādisassa sayanassa majjhamhi sukhaṃ sayitvā idāni kathaṃ araññe ramissasi ehi gacchāma sammāti. Nissiveti rattibhāge. Hetvāti evarūpaṃ sampattiṃ chaḍḍetvā. Uyyāna sampannapahūtamālyanti mahārāja tava uyyānaṃ sampannanānāvidhapupphaṃ. Migājinūpetapuraṃ Surammanti taṃ uyyānaṃ migājinaṃ nāma nāmena tena upetaṃ puraṃpi te suṭṭhu rammaṃ. Hitvāti evarūpaṃ manoramaṃ nagaraṃ chaḍḍetvā.
Iti mahāsatto appeva nāmesa pubbe anubhuttaṃ upabhogaparibhogarasaṃ saritvā gantukāmo bhaveyyāti porisādaṃ paṭhamaṃ bhojanena palobhesi. Dutiyaṃ kilesavasena tatiyaṃ sayanena catutthaṃ naccagītavāditena pañcamaṃ uyyānena ceva nagarena cāti imehi ettakehi palobhetvā ehi mahārāja ahantaṃ ādāya bārāṇasiyaṃ patiṭṭhapetvā pacchā sakaraṭṭhaṃ gamissāmi sace bārāṇasiyaṃ raṭṭhaṃ na labhissasi mama upaḍḍharajjaṃ te dassāmi kinte araññavāsena mama vacanaṃ karohīti āha. Tassa vacanaṃ sutvā gantukāmo hutvā sutasomo mayhaṃ atthakāmo anukampako paṭhamaṃ maṃ kalyāṇe patiṭṭhapetvā idāni porāṇayaseva patiṭṭhapessāmīti vadati sakkhissati cesa patiṭṭhapetuṃ iminā saddhiṃyeva gantuṃ vaṭṭati kiṃ me araññavāsenāti cintetvā tuṭṭhacitto tassa guṇaṃ nissāya vaṇṇaṃ kathetukāmo samma sutasoma kalyāṇamittasaṃsaggato sādhutaraṃ pāpamittasaṃsaggato pāpataraṃ nāma natthīti vatvā āha