Tattha suve suveti divase divase. Anaddhaneyyanti na addhānakkhamaṃ. Sareti samudde. Naravīraseṭṭhāti narapurisena seṭṭha. Udakaṃ sarevāti samudde vuṭṭhaudakaṃ viya. Abyāyikoti avigacchanako. Yāvampi tiṭṭheyyāti yattakaṃ kālaṃ jīvitaṃ tiṭṭheyya tattakaṃ kālaṃ tatheva hoti na jirati sappurisehi mittabhāvoti.

Iti porisādo sattahi gāthāhi mahāsattassa guṇaṃ kathesi. Mahāsattopi porisādañca te ca rājāno gahetvā paccantagāmaṃ agamāsi. Paccantagāmavāsino mahāsattaṃ disvā nagaraṃ gantvā ācikkhiṃsu. Amaccā balanikāyaṃ ādāya gantvā parivārayiṃsu. Mahāsatto tena parivārena bārāṇasiṃ agamāsi. Antarāmagge janapadavāsino paṇṇākāraṃ datvā anugacchiṃsu. Mahāsatto mahāparivāro ahosi tena saddhiṃ bārāṇasiṃ pāpuṇi. Tadā porisādassa putto rājā hoti senāpati kālahatthīyeva. Nāgarā rañño ārocayiṃsu mahārāja sutasomo kira porisādaṃ dametvā ādāya idhāgacchati nagarassa pavisituṃ na dassāmāti sīghaṃ nagaradvārāni pidahitvā āvudhahatthā aṭṭhaṃsu. Mahāsatto dvārānaṃ pidahitabhāvaṃ ñatvā porisādañca parosate ca rājāno ohāya katipayehi amaccehi saddhiṃ dvārasamīpaṃ gantvā ahaṃ sutasomamahārājā dvāraṃ vivarathāti āha. Purisā gantvā rañño ārocesuṃ. So rājā sutasomamahārājā paṇḍito dhammarājā sīle ṭhito nissaṃsayaṃ no bhayaṃ natthīti vatvā khippaṃ vivarathāti vivarāpesi. Mahāsatto nagaraṃ pāvisi. Rājā ca kālahatthī cassa paccuggamanaṃ katvā taṃ ādāya pāsādaṃ āropayiṃsu. So rājāsane nisīditvā porisādassa aggamahesiñca sesaamacce ca pakkosāpetvā rājānaṃ āha kālahatthi kasmā rañño nagaraṃ pavisituṃ na dethāti. So rajjaṃ kārento imasmiṃ nagare bahū manusse khādi khattiyehi akattabbakammaṃ kari Sakalajambūdīpe chiddaṃ akāsi evarūpo pāpadhammo tena kāraṇenāti. Idāni so evarūpaṃ karissatīti tumhe mā cintayittha ahantaṃ dametvā sīlesu patiṭṭhāpesiṃ jīvitahetupi kiñci na viheṭhessati natthi vo tato bhayaṃ evaṃ mā karittha puttehi nāma mātāpitaro paṭijaggitabbā mātāpituposakā hi saggaṃ gacchanti itare janā nirayaṃ gacchantīti.