Catunnampi mahādīpānaṃ dvisahassaparittadīpaparivārānaṃ rajjaṃ kāretuṃ samattho hoti nāssa koci antarāyo paññāyatīti vadiṃsu. Rājā tesaṃ vacanaṃ sutvā tuṭṭho kumārassa nāmaṃ karonto yasmā pana kumārassa jātadivase sakalakāsikaraṭṭhe devo vassi yasmā ca so rañño ceva amaccānañca mahājanānañca hadayaṃ temiyamāno viya jāto tasmā temiyakumārotvevassa nāmaṃ akāsi. Atha naṃ ekamāsikaṃ dhātiyo nahāpetvā alaṅkaritvā rañño santikaṃ ānayiṃsu. Rājā piyaputtaṃ oloketvā āliṅgitvā sīse cumbitvā aṅke nisīdāpetvā kumārassa ramayamāno nisīdi. Tasmiṃ khaṇe cattāro corā ānītā. Rājā te disvā tesu ekassa corassa sakaṇṭakāhi kasāhi pahārasahassaṃ karothāti āṇāpesi ekassa corassa saṃkhalikāya bandhitvā bandhanāgārappavesanaṃ karothāti āṇāpesi ekassa corassa sarīre sattippahāraṃ karothāti āṇāpesi ekassa corassa sūlāropanaṃ karothāti āṇāpesi.

Atha mahāsatto pituvacanaṃ sutvā bhītatasito hutvā aho mama pitā rajjaṃ nissāya atibhāriyaṃ nirayagāmiṃ kammaṃ karotīti cintesi. Punadivase bodhisattaṃ setacchattassa heṭṭhā alaṅkatasirisayane nipajjāpesuṃ. So thokaṃ niddāyitvā pabuddho akkhīni ummiletvā setacchattaṃ olokento mahantaṃ sirivibhavaṃ passi. Athassa pakatiyā bhītatasitassa atirekataraṃ bhayaṃ uppajji. So cintesi kuto nukho ahaṃ imaṃ rājagehaṃ āgatomhīti. So upadhārento jātissarañāṇena Devalokato āgatabhāvaṃ ñatvā tato paraṃ olokento ussudaniraye pacanabhāvaṃ passi tato paraṃ olokento tasmiṃyeva nagare rājabhāvaṃ aññāsi. Athassa svāhaṃ vīsativassāni bārāṇasiyaṃ rajjaṃ kāretvā asītivassasahassāni ussudaniraye pacitvā idāni punapi imasmiṃ coragehe nibbattosmi pitā me hiyyo catūsu coresu ānītesu tathārūpaṃ pharusaṃ nirayasaṃvattanikaṃ kathaṃ kathesi sacāhaṃ rajjaṃ kāressāmi punapi niraye nibbattitvā mahādukkhaṃ anubhavissāmīti āvajjentasseva mahantaṃ bhayaṃ uppajji. Bodhisattassa kāñcanavaṇṇaṃ sarīraṃ hatthena parimadditaṃ viya padumaṃ milātaṃ duvaṇṇaṃ ahosi. So kathaṃ nukho ahaṃ imamhā coragehā muñceyyanti cintento nipajji.