๕. ปรมฏฺฐกสุตฺตนิทฺเทสวณฺณนา

[๓๑] ปญฺจเม ปรมฏฺฐกสุตฺเต ปรมนฺติ ทิฏฺฐีสุ ปริพฺพสาโนติ อิทํ ปรมนฺติ คเหตฺวา สกาย สกาย ทิฏฺฐิยา วสมาโน. ยทุตฺตรึ กุรุเตติ ยํ อตฺตโน สตฺถาราทึ เสฏฺฐํ กโรติ. หีนาติ อญฺเญ ตโต สพฺพมาหาติ ตํ อตฺตโน สตฺถาราทึ ฐเปตฺวา ตโต อญฺเญ สพฺเพ "หีนา อิเม"ติ อาห. ตสฺมา วิวาทานิ อวีติวตฺโตติ เตน การเณน ตานิ ทิฏฺฐิกลหานิ ๑- อวีติวตฺโตว โหติ.

วสนฺตีติ ปฐมุปฺปนฺนทิฏฺฐิวเสน วสนฺติ. ปวสนฺตีติ ปวิสิตฺวา วสนฺติ. อาวสนฺตีติ วิเสเสน วสนฺติ. ปริวสนฺตีติ สพฺพภาเคน วสนฺติ. ตํ อุปมาย สาเธนฺโต "ยถา อาคาริกา วา"ติอาทิมาห. อาคาริกา วาติ ฆรสามิกา. ฆเรสุ วสนฺตีติ อตฺตโน ฆเรสุ อาสงฺกวิรหิตา หุตฺวา นิวสนฺติ. สาปตฺติกา วาติ อาปตฺติพหุลา. สกิเลสาติ ๒- ราคาทิกิเลสพหุลา. อุตฺตรึ กโรตีติ อติเรกํ กโรติ. อยํ สตฺถา สพฺพญฺญูติ อยํ อมฺหากํ สตฺถา สพฺพํ ชานาติ.

สพฺเพ ปรปฺปวาเท ขิปตีติ สพฺพาปรลทฺธิโย ฉฑฺเฑติ. อุกฺขิปตีติ นีหรติ. ปริกฺขิปตีติ ปรมฺมุเข กโรติ. ทิฏฺฐิเมธคานีติ ทิฏฺฐิวิเหสกานิ.