@๔ องฺ.นวก. ๒๓/๑๕/๔๑๖ ๕ ขุ.ธ. ๒๕/๔๐/๒๓ ๖ สี.,ม. อตฺตราควเสน

วินิพนฺโธ มานวเสนาติ นานาวิเธน มานาติมานวเสน วิวิเธ ๑- อารมฺมเณ พทฺโธ หุตฺวา ติฏฺฐติ. ปรามฏฺโฐ ทิฏฺฐิวเสนาติ ทฺวาสฏฺฐิทิฏฺฐีนํ วเสน ปรามฏฺโฐ อามสิตฺวา คหิโต. วิกฺเขปคโต อุทฺธจฺจวเสนาติ อารมฺมเณ อสนฺติฏฺฐนวเสน จิตฺตวิกฺเขปํ ปตฺโต อุปคโต. อนิฏฺฐงฺคโต วิจิกิจฺฉาวเสนาติ รตนตฺตยาทีสุ กงฺขาสงฺขาตาย วิจิกิจฺฉาย วเสน สนฺนิฏฺฐานํ อปฺปตฺโต. ถามคโต อนุสยวเสนาติ ทุนฺนีหรณอปฺปหีนานุสยวเสน ถิรภาวปฺปตฺโต อุปคโต หุตฺวา ติฏฺฐติ.

รูปูปยนฺติ ตณฺหาทิฏฺฐูปายวเสน รูปํ อุปคนฺตฺวา อารมฺมณํ กตฺวา. วิญฺญาณํ ติฏฺฐมานํ ติฏฺฐตีติ ตสฺมึ อารมฺมเณ รูปารมฺมณํ วิญฺญาณํ ติฏฺฐนฺตํ ติฏฺฐติ. รูปารมฺมณํ รูปปฺปติฏฺฐนฺติ รูปเมว อารมฺมณํ อาลมฺพิตฺวา รูปเมว ปติฏฺฐํ กตฺวา. นนฺทูปเสจนนฺติ สปฺปีติกตโณฺหทเกน อาสิตฺตํ วิญฺญาณํ. วุฑฺฒินฺติ วุฑฺฒิภาวํ. วิรูฬฺหินฺติ ชวนวเสน อุปริโต วิรูฬฺหิภาวํ. เวปุลฺลนฺติ ตทารมฺมณวเสน เวปุลฺลํ.