ภวสาตพนฺธาติ ภเว สาตํ ภวสาตํ, เตน ภวสาเตน สุขสฺสาเทน พนฺธา หุตฺวา ฐิตา. ตํ ภาเชตฺวา ทสฺเสตุํ "เอกํ ภวสาตํ:- สุขา เวทนา"ติอาทิมาห. โยพฺพนสฺส ภาโว โยพฺพญฺญํ. โรคสฺส อภาโว อาโรคฺยํ. ชีวิตินฺทฺริยสฺส ปวตฺตภาโว ชีวิตํ. ลาโภติ จตุนฺนํ ปจฺจยานํ ลาโภ. ยโสติ ปริวาโร. ปสํสาติ กิตฺติ. สุขนฺติ กายิกเจตสิกํ สุขํ. มนาปิกา รูปาติ มนวฑฺฒนกา รูปา. เสเสสุปิ เอเสว นโย.
จกฺขุสมฺปทาติ จกฺขุสฺส สมฺปทา. "มยฺหํ จกฺขุสมฺปนฺนํ มณิวิมาเน อุคฺฆาฏิตสีหปญฺชรํ วิย ขายตี"ติ อุปฺปนฺนํ สุขสฺสาทํ สนฺธาย "จกฺขุสมฺปทา"ติ วุตฺตํ. โสตสมฺปทาทีสุปิ เอเสว นโย. สุขาย เวทนาย สาตพนฺธา ฯเปฯ วิพนฺธาติ มูลปทํ. วินิพนฺธาติ วิวิธากาเรน พนฺธา. อาพนฺธาติ วิเสเสน อาทิโต พนฺธา.
น หิ อญฺญโมกฺขาติ น ปเรหิ โมกฺขา. เต วา ภวสาตวตฺถู ทุปฺปมุญฺจาติ ภเว สุขสฺสาทวตฺถุภูตา ธมฺมา เต มุญฺจิตุํ ทุกฺขา. สตฺตา วา เอตฺโต ทุมฺโมจยาติ สตฺตา เอว วา เอตสฺมา ภวสาตวตฺถุโต โมเจตุํ ทุกฺขา.