ชปฺปนฺตาติ คุณวเสน กเถนฺตา. ปชปฺปนฺตาติ ปกาเรน กเถนฺตา. อภิชปฺปนฺตาติ วิเสเสน กเถนฺตา, อุปสคฺควเสน วา วฑฺฒิตํ.
[๙] เอวํ ปฐมคาถาย "ทูเร วิเวกา หิ ตถาวิโธ"ติ สาเธตฺวา ทุติยคาถาย จ ตถาวิธานํ ธมฺมตํ อาวิกตฺวา อิทานิ เตสํ ปาปกมฺมกรณํ ๑- อาวิกโรนฺโต "กาเมสุ คิทฺธา"ติ คาถมาห.
ตสฺสตฺโถ:- เต สตฺตา กาเมสุ ปริโภคตณฺหาย คิทฺธา, ปริเยสนาทิมนุยุตฺตตฺตา ปสุตา, สมฺโมหมาปนฺนตฺตา ปมูฬฺหา, อวคมนตาย มจฺฉริยตาย พุทฺธาทีนํ วจนํ อนาทิยนตาย ๒- จ อวทานิยา, กายวิสมาทิมฺหิ วิสเม นิวิฏฺฐา, อนฺตกาเล มรณทุกฺขูปนีตา, "กึสุ ภวิสฺสาม อิโต จุตาเส"ติ ปริเทวยนฺตีติ.
คิทฺธาติ กามราเคน คิทฺธา. คธิตาติ สงฺกปฺปราเคน ปจฺจาสึสมานา หุตฺวา คธิตา. มุจฺฉิตาติ กามตณฺหาย มุจฺฉาปเรตา. อชฺโฌปนฺนาติ กามนนฺทิยา อธิโอปนฺนา ๓- อชฺโฌตฺถฏา. ลคฺคาติ กามสิเนเหน อลฺลีนา. ลคฺคิตาติ กามปริฬาเหน เอกีภูตา. ปลิพุทฺธาติ กามสญฺญาย อาวฏฺฏิตา. อถ วา "ทิฏฺฐิทสฺสเน คิทฺธา. อภิณฺหทสฺสเน คธิตา. สํสคฺคกิริยสฺมึ มุจฺฉิตา. วิสฺสาสกิริยสฺมึ อชฺโฌปนฺนา. สิเนหวลญฺชสฺมึ ลคฺคา. ทฺวยนฺทฺวยสมาปตฺติมฺหิ ลคฺคิตา. อปราปรํ อมุญฺจมานา หุตฺวาว ปลิพุทฺธา"ติ เอวเมเก วณฺณยนฺติ.