[๓๓] ตติยคาถายตฺโถ:- เอวํ ปสฺสโต ปสฺส ๑- ยํ อตฺตโน สตฺถาราทึ นิสฺสิโต อญฺญํ ปรสตฺถาราทึ หีนํ ปสฺสติ, ตํ ปน ทสฺสนํ คนฺถเมว กุสลา วทนฺติ, พนฺธนนฺติ วุตฺตํ โหติ. ยสฺมา เอตเทว, ตสฺมา หิ ทิฏฺฐํว สุตํ มุตํ วา, สีลพฺพตํ ภิกฺขุ น นิสฺสเยยฺย, นาภินิวิเสยฺยาติ ๒- วุตฺตํ โหติ.

กุสลาติ ขนฺธาทิชานเน เฉกา. ขนฺธกุสลาติ รูปาทีสุ ปญฺจสุ ขนฺเธสุ กุสลา. ธาตุอายตนปฏิจฺจสมุปฺปาทสติปฏฺฐานสมฺมปฺปธานอิทฺธิปาทอินฺทฺริยพลโพชฺฌงฺคมคฺค- ผลนิพฺพาเนสุปิ เอเสว นโย. ตตฺถ มคฺคกุสลาติ จตูสุ มคฺเคสุ. ผลกุสลาติ จตูสุ ผเลสุ. นิพฺพานกุสลาติ ทุวิเธ นิพฺพาเน เฉกา. เต กุสลาติ เต เอเตสุ วุตฺตปฺปกาเรสุ เฉกา. เอวํ วทนฺตีติ เอวํ กเถนฺติ. คนฺโถ เอโสติ ปสฺสโต จ อตฺตโน สตฺถาราทินิสฺสิตญฺจ อญฺญํ ปรสตฺถาราทึ หีนโต ทสฺสนญฺจ คนฺโถ พนฺธโน เอโสติ วทนฺติ. ลมฺพนํ ๓- เอตนฺติ เอตํ วุตฺตปฺปการํ นาคทนฺเต ลคฺคิตํ วิย อโธลมฺพนํ. พนฺธนํ เอตนฺติ นิจฺฉินฺทิตุํ ทุกฺขฏฺเฐน สงฺขลิกาทิพนฺธนํ วิย เอตํ พนฺธนํ. ปลิโพโธ เอโสติ สํสารโต นิกฺขมิตุํ อปฺปทานฏฺเฐน เอโส ปลิโพโธ.

[๓๔] จตุตฺถคาถายตฺโถ:- น เกวลํ ทิฏฺฐสุตาทึ ๔- น นิสฺสเยยฺย, อปิ จ โข ปน อสญฺชาตํ อุปรูปริ ทิฏฺฐิมฺปิ โลกสฺมึ น กปฺปเยยฺย, น ชเนยฺยาติ วุตฺตํ โหติ. กีทิสํ? ญาเณน วา สีลพฺพเตน วาปิ, สมาปตฺติญาณาทินา ญาเณน วา สีลพฺพเตน วา ยํ กปฺปยิสฺสติ, ๕- เอตํ ทิฏฺฐึ น กปฺปเยยฺย. ๖- น เกวลญฺจ