เย กิเลสาติ เย กิเลสา โสตาปตฺติมคฺเคน ปหีนา, เต กิเลเส. น ปุเนตีติ น ปุน เอติ. น ปจฺเจตีติ ปุน นิพฺพตฺเตตฺวา น ปฏิเอติ, น ปจฺจาคจฺฉตีติ ปจฺจภเว นาคจฺฉติ. ปญฺจหากาเรหิ ตาทีติ ปญฺจหิ การเณหิ โกฏฺฐาเสหิ วา สทิโส. อิฏฺฐานิฏฺเฐ ตาทีติ อิฏฺฐารมฺมเณ จ อนิฏฺฐารมฺมเณ จ อนุนยปฏิฆํ มุญฺจิตฺวา ฐิตตฺตา ทฺวีสุ สทิโส. จตฺตาวีติ กิเลเส จชิตวา. ติณฺณาวีติ สํสารํ อติกฺกมิตวา. มุตฺตาวีติ ราคาทิโต มุตฺตวา. ตํนิทฺเทสา ตาทีติ เตน เตน สีลสทฺธาทินา นิทฺทิสิตฺวา นิทฺทิสิตฺวา กเถตพฺพโต สทิโส.

ตํ ปญฺจวิธํ วิตฺถาเรตฺวา กเถตุกาโม "กถํ อรหา อิฏฺฐานิฏฺเฐ ตาที"ติอาทิมาห. ตตฺถ ลาเภปีติ จตุนฺนํ ปจฺจยานํ ลาเภปิ. อลาเภปีติ เตสํ อลาเภปิ. ยเสปีติ ปริวาเรปิ. อยเสปีติ ปริวารวิปตฺติยาปิ. ปสํสายปีติ วณฺณภณนายปิ. นินฺทายปีติ ครหายปิ. สุเขปีติ กายิกสุเขปิ. ทุกฺเขปีติ กายิกทุกฺเขปิ. เอกํ เจ พาหํ คนฺเธน ลิมฺเปยฺยุนฺติ สเจ เอกํ พาหํ จตุชาติยคนฺเธน เลปํ อุปรูปริ ทเทยฺยุํ. วาสิยา ตจฺเฉยฺยุนฺติ ยทิ เอกํ พาหํ วฑฺฒกี วาสิยา ตจฺเฉตฺวา ตจฺเฉตฺวา ตนุํ กเรยฺยุํ. อมุสฺมึ นตฺถิ ราโคติ อมุสฺมึ คนฺธเลปเน สิเนโห นตฺถิ น สํวิชฺชติ. อมุสฺมึ นตฺถิ ปฏิฆนฺติ อมุสฺมึ วาสิยา ตจฺฉเน ปฏิหนนสงฺขาตํ ปฏิฆํ โกปํ นตฺถิ น สํวิชฺชติ. อนุนยปฏิฆวิปฺปหีโนติ สิเนหญฺจ โกปญฺจ ปชหิตฺวา ฐิโต. อุคฺฆาตินิคฺฆาติวีติวตฺโตติ อนุนยวเสน อนุคฺคหญฺจ ปฏิฆวเสน นิคฺคหญฺจ อติกฺกมิตฺวา ฐิโต. อนุโรธวิโรธสมติกฺกนฺโตติ อนุนยญฺจ ปฏิฆญฺจ สมฺมา อติกฺกนฺโต.

สีเล สตีติ สีเล สํวิชฺชมาเน. สีลวาติ สีลสมฺปนฺโน. เตน นิทฺเทสํ กถนํ ลภตีติ ตาที. สทฺธาย สติ สทฺโธติ เอวมาทีสุปิ เอเสว นโย.

สทฺธมฺมปชฺโชติกาย มหานิทฺเทสฏฺฐกถาย