ตตฺถ สูติฆเรติ สูติกฆเร, วิชายนฆเรติ อตฺโถ. "สูติกาฆเร"ติ วา ปาโฐ, สูติกายาติ ปทจฺเฉโท. อฑฺฒมาสิโกปีติ วิชาตทิวสโต ๒- ปฏฺฐาย อฑฺฒมาโส เอตสฺส อตฺถีติ อฑฺฒมาสิโก. เทฺวมาสิกาทีสุปิ เอเสว นโย. ชาตทิวสโต ปฏฺฐาย เอกํ สํวจฺฉรํ เอตสฺส อตฺถีติ สํวจฺฉริโก. อุปริ เทฺววสฺสิกาทีสุปิ เอเสว นโย.

ยทา ชิณฺโณ โหตีติ ยสฺมึ กาเล ชราชิณฺโณ ภวติ ชชฺชรีภูโต. วุฑฺโฒติ วโยวุฑฺโฒ. มหลฺลโกติ ชาติมหลฺลโก. อทฺธคโตติ ตโย อทฺเธ อติกฺกนฺโต. วโยอนุปฺปตฺโตติ ตติยํ วยํ อนุปฺปตฺโต. ขณฺฑทนฺโตติ อนฺตรนฺตรา ปติตา ทนฺตา ผาลิตา จ ชรานุภาเวน ขณฺฑา ทนฺตา ชาตา อสฺสาติ ขณฺฑทนฺโต. ปลิตเกโสติ ปณฺฑรเกโส. วิลูนนฺติ ลุญฺจิตฺวา คหิตา เกสา วิย ขลฺลาตํ. ๓- ขลิตสิโรติ มหาขลฺลาฏสีโส. วลินนฺติ สญฺชาตวลิ. ติลกาหตคตฺโตติ เสตติลกกาฬติลเกหิ วิกิณฺณสรีโร. โภคฺโคติ ภคฺโค, อิมินาปิสฺส วงฺกภาวํ ทีเปติ. ทณฺฑปรายโนติ ทณฺฑปฏิสฺสรโณ ทณฺฑทุติโย. โส ชรายปีติ โส ปุคฺคโล ชรายปิ อภิภูโต มรติ. นตฺถิ มรณมฺหา โมกฺโขติ มรณโต มุจฺจนุปาโย นตฺถิ นุปลพฺภติ.

ผลานมิว ปกฺกานํ, ปาโต ปตนโต ภยนฺติ ปริปากคตานํ สิถิลวณฺฏานํ ปนสผลาทิปกฺกานํ ปจฺจูสกาเล อวสฺสํ ปติสฺสนฺตีติ ผลสามิกานํ ภายนํ ๔- วิย. เอวํ ชาตาน มจฺจานํ, นิจฺจํ มรณโต ภยนฺติ เอวเมว อุปฺปนฺนานํ สตฺตานํ มจฺจุสงฺขาตมรณโต สตตํ กาลํ ภยํ.

ยถาปิ กุมฺภการสฺสาติ ยถา นาม มตฺติกาภาชนํ กโรนฺตสฺส. กตา มตฺติกภาชนาติ ๕- เตน นิฏฺฐาปิตภาชนํ. สพฺเพ เภทปริยนฺตาติ ปกฺกาปกฺกํ สพฺพํ เภทนํ