อนิจฺโจติ หุตฺวา อภาวฏฺเฐน. สงฺขโตติ ปจฺจเยหิ สงฺคมฺม กโต. ปฏิจฺจสมุปฺปนฺโนติ ปจฺจยสามคฺคึ ปฏิจฺจ น ปจฺจกฺขาย สห สมฺมา จ อุปฺปนฺโน. ขยธมฺโมติ ขยํ คมนสภาโว. วยธมฺโมติ วยํ คมนสภาโว, ภงฺคํ คมนสภาโวติ ๑- อตฺโถ. วิราคธมฺโมติ วิรชฺชนสภาโว. นิโรธธมฺโมติ นิรุชฺฌนสภาโว. ยฺวายํ ปริคฺคโหติ โย อยํ ปริคฺคโห. "ยายํ ๒- ปริคฺคโห"ติปิ ปาโฐ, อยเมว ปทจฺเฉโท. นิจฺโจติ สตตกาลิโก. ธุโวติ ถิโร. สสฺสโตติ อจวโน. อวิปริณามธมฺโมติ ปกติอชหนสภาโว. สสฺสติสมํ ตเถว ฐสฺสตีติ จนฺทสูริยสิเนรุมหาสมุทฺทปฐวีปพฺพตาทโย วิย ติฏฺเฐยฺย.
นานาภาโวติ ชาติยา นานาสภาโว. ๓- วินาภาโวติ มรเณน วิโยคภาโว. อญฺญถาภาโวติ ภเวน ๔- อญฺญถาภาโว. ปุริมานํ ปุริมานํ ขนฺธานนฺติ อนนฺตเร ปุเร อุปฺปนฺนานํ ขนฺธานํ. วิปริณามญฺญถาภาวาติ ปกติภาวํ ชหิตฺวา อญฺญถาภาเวน. ปจฺฉิมา ปจฺฉิมา ขนฺธาทโย ปวตฺตนฺติ อุปฺปชฺชนฺตีติ สมฺพนฺโธ.
สพฺพํ ฆราวาสปลิโพธนฺติ สกลํ คิหิภาวชฏํ. ญาติมิตฺตามจฺจปลิโพธนฺติ มาตาปิตุปกฺขิกา ญาตี, มิตฺตา สหายา, อมจฺจา คุมฺพา. ๕- สนฺนิธิปลิโพธนฺติ นิธานชฏํ ฉฑฺเฑตฺวา. ๖- เกสมสฺสุํ โอหาเรตฺวาติ เกเส จ มสฺสูนิ จ โอโรปยิตฺวา. กาสายานิ วตฺถานีติ กาสายรสปีตานิ ๗- วตฺถานิ.
[๔๑] มามโกติ มม อุปาสโก ภิกฺขุ วาติ สงฺขฺยํ คโต, พุทฺธาทีนิ วา วตฺถูนิ มมายมาโน.