[๔๖] อิทานิ "โย อตฺตานํ ภวเน น ทสฺสเย"ติ เอวํ ขีณาสโว วิภาวิโต, ตสฺส วณฺณภณนตฺถํ อิโต ปรํ ติสฺโส คาถาโย อาห. ตตฺถ ปฐมคาถาย จ สพฺพตฺถาติ ทฺวาทสสุ อายตเนสุ. น ปิยํ กุพฺพติ โนปิ อปฺปิยนฺติ นิทฺเทเส ปิยาติ จิตฺเต ปีติกรา. เต วิภาคโต ทสฺเสนฺโต "กตเม สตฺตา ปิยา, อิธ ยสฺส เต โหนฺตี"ติ อาห. ตตฺถ ยสฺส เตติ เย อสฺส เต. โหนฺตีติ ภวนฺติ. อตฺถกามาติ วุฑฺฒิกามา. หิตกามาติ สุขกามา. ผาสุกามาติ สุขวิหารกามา. โยคกฺเขมกามาติ จตูหิ โยเคหิ เขมํ นิพฺภยํ กามา. มมายตีติ มาตา. ปิยายตีติ ปิตา. ภชตีติ ภาตา. ภคินีติ เอตฺถาปิ เอเสว นโย. ปุตฺตยติ ๔- รกฺขตีติ ปุตฺโต. กุลวํสํ ธาเรตีติ ธีตา. มิตฺตา สหายา. อมจฺจา ภจฺจา. ๕- ญาตี ปิตุปกฺขิกา. สาโลหิตา มาตุปกฺขิกา. ๖- อิเม สตฺตา ปิยาติ อิเม สตฺตา ปีติชนกา. วุตฺตวิปริยาเยน อปฺปิยา เวทิตพฺพา.

[๔๗] ยทิทํ ทิฏฺฐสุตมุเตสุ วาติ เอตฺถ ปน ยทิทํ ทิฏฺฐสุตํ, เอตฺถ วา มุเตสุ วา ธมฺเมสุ เอวํ มุนิ น อุปลิมฺปตีติ เอวํ สมฺพนฺโธ เวทิตพฺโพ.

อุทกเถโวติ อุทกสฺส เถโว. "อุทกตฺเถวโก"ติปิ ปาโฐ. ปทุมปตฺเตติ ปทุมินิปตฺเต.

[๔๘] โธโน น หิ เตน มญฺญติ, ยทิทํ ทิฏฺฐสุตมุเตสุ วาติ อตฺราปิ ยทิทํ ทิฏฺฐสุตํ, เตน วตฺถุนา น มญฺญติ, มุเตสุ วา ธมฺเมสุ น มญฺญตีติ เอวเมว สมฺพนฺโธ เวทิตพฺโพ. น หิ สารชฺชติ ๗- โน วิรชฺชตีติ พาลปุถุชฺชโน