ปาณมฺปิ หนตีติ ชีวิตินฺทฺริยมฺปิ ฆาเตติ. อทินฺนมฺปิ อาทิยตีติ ปรปริคฺคหิตมฺปิ วตฺถุํ คณฺหาติ. สนฺธิมฺปิ ฉินฺทตีติ ฆรสนฺธิมฺปิ ฉินฺทติ. นิลฺโลปมฺปิ หรตีติ คาเม ปหริตฺวา มหาวิโลปมฺปิ กโรติ. เอกาคาริกมฺปิ กโรตีติ ปณฺณาสมตฺเตหิปิ สฏฺฐิมตฺเตหิปิ ปริวาเรตฺวา ชีวคฺคาหํ คเหตฺวาปิ ธนํ อาหราเปติ. ปริปนฺเถปิ ติฏฺฐตีติ ปนฺถทูหนกมฺมํ กโรติ. ปรทารมฺปิ คจฺฉตีติ ปรทาเรสุ จาริตฺตํ อาปชฺชติ. มุสาปิ ภณตีติ อตฺถภญฺชนกํ มุสาปิ วทติ. อนริยธมฺโมติ อนริยสภาโว.

[๕๑] เอโก ปุพฺเพ จริตฺวานาติ ปพฺพชฺชาสงฺขาเตน วา คณาววสฺสคฺคฏฺเฐน วา ปุพฺเพ โลเก วิจริตฺวา. ๗- ยานํ ภนฺตํว ตํ โลเก, หีนมาหุ ปุถุชฺชนนฺติ ตํ วิพฺภนฺตกํ ปุคฺคลํ ยถา หตฺถิยานาทิยานํ อทนฺตํ วิสมมฺปิ อาโรหติ, อาโรหนกมฺปิ ภญฺชติ, ปปาเตปิ ปปตติ, เอวํ กายทุจฺจริตาทิวิสมาโรหเนน นิรยาทีสุ, อตฺถภญฺชเนน ชาติปปาตาทีสุ ปปตเนน จ ยานํ ภนฺตํว หีนํ ปุถุชฺชนญฺจ อาหูติ.

ปพฺพชฺชาสงฺขาเตน วาติ ปพฺพชฺชาโกฏฺฐาเสน วา "ปพฺพชิโต สมโณ"ติ คณนาโรปเนน วา. คณาววสฺสคฺคฏฺเฐน วาติ คณสงฺคณิการามตํ วิสฺสชฺเชตฺวา จรณฏฺเฐน ๘- วา.