@๔ ที.มหา. ๑๐/๓๔๔/๒๒๖ ๕ ม.อุ. ๑๔/๘๕/๖๗ ๖ ฉ.ม. สมฺมุสฺสตีติ

@๗ สี.,ฉ.ม. วิหริตฺวา ๘ ฉ.ม. วสฺสคฺคฏฺเฐน

เอโก ปฏิกฺกมตีติ เอกโกว คามโต นิวตฺตติ. โย นิเสวตีติ นิทฺเทสสฺส อุทฺเทสปทํ. อปเรน สมเยนาติ อญฺญสฺมึ กาเล อปรภาเค. พุทฺธนฺติ สพฺพญฺญุพุทฺธํ. ธมฺมนฺติ สฺวากฺขาตตาทิคุณยุตฺตํ ธมฺมํ. สํฆนฺติ สุปฺปฏิปนฺนตาทิคุณยุตฺตํ สํฆํ. สิกฺขนฺติ อธิสีลาทิสิกฺขิตพฺพํ สิกฺขํ. ปจฺจกฺขายาติ พุทฺธาทึ ปฏิกฺขิปิตฺวา. หีนายาติ หีนตฺถาย คิหิภาวาย. อาวตฺติตฺวาติ นิวตฺติตฺวา. เสวตีติ เอกวารํ เสวติ. นิเสวตีติ อเนกวิเธน เสวติ. สํเสวตีติ อลฺลียิตฺวา เสวติ. ปฏิเสวตีติ ปุนปฺปุนํ เสวติ.

ภนฺตนฺติ วิพฺภนฺตํ. อทนฺตนฺติ ทนฺตภาวํ อนุปนีตํ. อการิตนฺติ สุสิกฺขิตกิริยํ อสิกฺขาปิตํ. อวินีตนฺติ อาจารสมฺปตฺติยา ๑- อสิกฺขิตํ. อุปฺปถํ คณฺหาตีติ วุตฺตปฺปการํ ยานํ อทนฺตตาทิยุตฺตํ ๒- ภนฺตํ วิสมมคฺคํ อุเปติ. วิสมํ ขาณุมฺปิ ปาสาณมฺปิ อภิรุหตีติ วิสมํ หุตฺวา ฐิตํ ขทิราทิขาณุมฺปิ ๓- ตถา ปพฺพตปาสาณมฺปิ อาโรหติ. ยานมฺปิ อาโรหนกมฺปิ ภญฺชตีติ วยฺหาทิยานํ อาโรหนฺตสฺส ปาเชนฺตสฺส หตฺถปาทาทิมฺปิ ภินฺทติ. ปปาเตปิ ปปตตีติ เอกโต ฉินฺนปพฺภารปปาเตปิ ปาเตติ. โส วิพฺภนฺตโกติ โส ปฏิกฺกนฺตโก. ภนฺตยานปฏิภาโคติ อนวฏฺฐิตยานสทิโส. อุปฺปถํ คณฺหาตีติ กุสลกมฺมปถโต ปฏิกฺกมิตฺวา อปายปถภูตํ อุปฺปถํ มิจฺฉามคฺคํ อุเปติ. วิสมํ กายกมฺมํ อภิรุหตีติ สมสฺส ปฏิปกฺขํ กายทุจฺจริตสงฺขาตํ วิสมํ กายกมฺมํ อาโรหติ. เสเสสุปิ เอเสว นโย. นิรเย อตฺตานํ ภญฺชตีติ นิรสฺสาทสงฺขาเต นิรเย อตฺตภาวํ จุณฺณวิจุณฺณํ กโรติ. มนุสฺสโลเก อตฺตานํ ภญฺชตีติ วิวิธกมฺมกรณวเสน ภญฺชติ. เทวโลเก อตฺตานํ ภญฺชตีติ ปิยวิปฺปโยคาทิทุกฺขวเสน. ชาติปปาตมฺปิ ปปตตีติ ชาติปปาเตปิ ปาเตติ. ชราปปาตาทีสุปิ เอเสว นโย. มนุสฺสโลเกติ อิธ อธิปฺเปตโลกเมว ทสฺเสติ.