กามสงฺกปฺเปนาติ กามปฏิสํยุตฺเตน วิตกฺเกน. อุปริฏฺเฐปิ เอเสว นโย. ผุฏฺโฐติ วิตกฺเกหิ ผุสิโต. ปเรโตติ อปริหีโน. สโมหิโตติ สมฺมา โอหิโต อนฺโต ปวิฏฺโฐ. กปโณ วิยาติ ทุคฺคตมนุสฺโส วิย. มนฺโท วิยาติ อญฺญาณี วิย. โมมูโห วิยาติ สมฺโมหภูโต วิย. ฌายตีติ จินฺเตติ. ปชฺฌายตีติ ภุสํ จินฺเตติ. นิชฺฌายตีติ อเนกวิเธน จินฺเตติ. อปชฺฌายตีติ ตโต อปคนฺตฺวา จินฺเตติ. อุลูโกติ อุลูกสกุโณ. รุกฺข- สาขายนฺติ รุกฺเข อุฏฺฐิตสาขายํ, วิฏเป วา. มูสิกํ มคยมาโนติ มูสิกํ คเวสมาโน, "มคฺคยมาโน"ติปิ ปฐนฺติ. โกตฺถูติ สิคาโล. พิฬาโรติ พพฺพุ. สนฺธิสมลสปงฺกตีเร- ติ ๑- ทฺวินฺนํ ฆรานํ อนฺตเร จ อุทกนิทฺธมนจิกฺขลฺลกจวรนิกฺขิปนฏฺฐาเน จ ถณฺฑิเล จ. วหจฺฉินฺโนติ ปิฏฺฐิคีวมํสจฺฉินฺโน. อิโต ปรา คาถา ปากฏสมฺพนฺธา เอว.
[๕๔] ตาสุ สตฺถานีติ กายทุจฺจริตาทีนิ. ตานิ หิ อตฺตโน ปเรสญฺจ เฉทนฏฺเฐน "สตฺถานี"ติ วุจฺจนฺติ. เตสุ จายํ ๒- วิเสเสน ตาว อาทิโต มุสาวจนสตฺถาเนว กโรติ, "อิมินา การเณนาหํ วิพฺภนฺโต"ติ ภณนฺโต. เตเนวาห "เอส ขฺวสฺส มหาเคโธ, โมสวชฺชํ ปคาหตี"ติ. ตตฺถ เอส ขฺวสฺสาติ เอส โข อสฺส. มหาเคโธติ มหาพนฺธนํ. กตโมติ เจ? ยทิทํ โมสวชฺชํ ปคาหติ, สฺวาสฺส ๓- มุสาวาทชฺโฌคาโห "มหาเคโธ"ติ เวทิตพฺโพ.
ตีณิ สตฺถานีติ ตโย เฉทกา. กายทุจฺจริตํ กายสตฺถํ. วจีสตฺถาทีสุปิ เอเสว นโย. ตํ วิภาคโต ทสฺเสตุํ "ติวิธํ กายทุจฺจริตํ กายสตฺถนฺ"ติ อาห. สมฺปชานมุสา ภาสตีติ ชานนฺโต ตุจฺฉํ วาจํ ภาสติ. อภิรโต อหํ ภนฺเต อโหสึ ปพฺพชฺชายาติ สาสเน ปพฺพชฺชาย อนภิรติวิรหิโต อหํ อาสึ. มาตา เม โปเสตพฺพาติ มาตา มยา โปสิตพฺพา. เตนมฺหิ วิพฺภนฺโตติ ภณตีติ เตน การเณน ปฏิกฺกนฺโต อสฺมีติ กเถติ. ปิตา มยา โปเสตพฺโพติอาทีสุปิ เอเสว นโย.