ลทฺธาติ ลภิตฺวา. อารกฺขมูลกนฺติ รกฺขนมูลกมฺปิ. กินฺติ เม โภเคติ เกน อุปาเยน มม โภเค. เนว ราชาโน หเรยฺยุํ ฯเปฯ น อปฺปิยา ทายาทา หเรยฺยุนฺติ. โคปยโตติ มญฺชุสาทีหิ โคปยนฺตสฺส. วิปฺปลุชฺชนฺตีติ วินสฺสนฺติ.

[๕๖] เอตมาทีนวํ ญตฺวา, มุนิ ปุพฺพาปเร อิธาติ เอตํ "ยโส กิตฺตี จ ยา ปุพฺเพ, หายเต วาปิ ตสฺส สา"ติ อิโต ปภูติ วุตฺตํ ปุพฺพาปรํ ๓- อิมสฺมึ สาสเน ปุพฺพโต อปเร สมณภาวโต วิพฺภนฺตกภาเว อาทีนวํ มุนิ ญตฺวา.

ทฬฺหํ กเรยฺยาติ นิทฺเทสปทสฺส อุทฺเทสปทํ. ถิรํ กเรยฺยาติ อสิถิลํ กเรยฺย. ทฬฺหํ สมาทาโน อสฺสาติ ถิรปฏิญฺโญ ภเวยฺย. อวฏฺฐิตสมาทาโนติ สนฺนิฏฺฐานปฏิญฺโญ.

[๕๗] เอตํ อริยานมุตฺตมนฺติ ยทิทํ วิเวกจริยา, เอตํ พุทฺธาทีนํ อริยานํ อุตฺตมํ. ตสฺมา วิเวกํเยว สิกฺเขถาติ อธิปฺปาโย. น เตน เสฏฺโฐ มญฺเญถาติ