อุณฺณตินฺติ อุสฺสาปนํ. อุณฺณมนฺติ อุคฺคนฺตฺวา ปฏฺฐปนํ. มานนฺติ อหงฺการํ. ๑- ถมฺภนฺติ พลกฺการํ. พนฺธนฺติ พนฺธการณํ. ๑- ถทฺโธติ อมทฺทโว. ๒- ปตฺถทฺโธติ วิเสเสน อมทฺทโว. ปคฺคหิตสิโรติ อุฏฺฐิตสีโส. สมนฺตาติ น อารกา. อาสนฺเนติ น ทูเร. อวิทูเรติ สมีเป. อุปกฏฺเฐติ สนฺติเก.
[๕๘] ริตฺตสฺสาติ วิวิตฺตสฺส, กายทุจฺจริตาทีหิ วิรหิตสฺส. โอฆติณฺณสฺส ปิหยนฺติ, กาเมสุ คธิตา ปชาติ วตฺถุกาเมสุ ลคฺคา สตฺตา ตสฺส จตุโรฆติณฺณสฺส ปิหยนฺติ อิณายิกา วิย อนณสฺสาติ ๓- อรหตฺตนิกูเฏน เทสนํ นิฏฺฐาเปสิ.
ริตฺตสฺสาติ สพฺพกิเลเสหิ ตุจฺฉสฺส. วิวิตฺตสฺสาติ สุญฺญสฺส. ปวิวิตฺตสฺสาติ เอกกสฺส. อิทานิ เยหิ ริตฺโต โหติ, เต ทสฺเสนฺโต "กายทุจฺจริเตน ริตฺตสฺสา"ติอาทิมาห. ตตฺถ กิเลสปฏิปาฏิยา มคฺคปฏิปาฏิยาติ ทฺวิธา ริตฺตตา เวทิตพฺพา. กิเลสปฏิปาฏิยา ตาว ราโค โมโห ถมฺโภ สารมฺโภ มาโน มโทติ อิเมหิ ฉหิ กิเลเสหิ อรหตฺตมคฺเคน ริตฺโต โหติ, โทโส โกโธ อุปนาโห ปมาโทติ อิเมหิ จตูหิ กิเลเสหิ อนาคามิมคฺเคน ริตฺโต โหติ, อติมาโน มกฺโข ปลาโส อิสฺสา มจฺฉริยํ มายา สาเฐยฺยนฺติ อิเมหิ สตฺตหิ โสตาปตฺติมคฺเคน ริตฺโต โหติ.