กาโมฆํ ติณฺณสฺสาติ อนาคามิมคฺเคน อาวฏฺฏนสงฺขาตํ ๑- กาโมฆํ ตริตฺวา ฐิตสฺส. ภโวฆนฺติ อรหตฺตมคฺเคน. ทิฏฺโฐฆนฺติ โสตาปตฺติมคฺเคน. อวิชฺโชฆนฺติ อรหตฺตมคฺเคน. สพฺพสงฺขารปถนฺติ ๒- สพฺพขนฺธธาตุอายตนปฏิปาฏิสงฺขาตํ ปถํ อรหตฺตมคฺเคเนว ตริตฺวา ฐิตสฺส. โสตาปตฺติมคฺเคน อุตฺติณฺณสฺส. สกทาคามิมคฺเคน นิตฺติณฺณสฺส. อนาคามิมคฺเคน กามธาตุํ อติกฺกนฺตสฺส. อรหตฺตมคฺเคน สพฺพภวํ สมติกฺกนฺตสฺส. ผลสมาปตฺติวเสน วีติวตฺตสฺส. ปารํ คตสฺสาติอาทีนิ นิพฺพานวเสน วุตฺตานิ. ยถา อิณายิกา อานณฺยนฺติ สํวฑฺฒิกอิณํ ๓- อาทาย วิจรนฺตา อานณฺยํ. ปตฺเถนฺตีติ ปตฺถนํ อุปฺปาเทนฺติ. อาพาธิกา อาโรคฺยนฺติ ปิตฺตาทิโรคาตุรา ๔- เภสชฺชกิริยาย โรควูปสมนํ ๕- อาโรคฺยํ. ยถา พนฺธนพนฺธาติ นกฺขตฺตทิวเส พนฺธนาคาเร พนฺธปุริสา. ๖- ยถา ทาสา ภุชิสฺสนฺติ ยสฺมา ภุชิสฺสา ปุริสา ยํ อิจฺฉนฺติ, ตํ กโรนฺติ, น นํ โกจิ พลกฺกาเรน ตโต นิวตฺเตติ, ตสฺมา ทาสา ภุชิสฺสภาวํ ปตฺเถนฺติ. ยถา กนฺตารทฺธานํ ปกฺขนฺนาติ ๗- ยสฺมา พลวนฺโต ปุริสา หตฺถภารํ คเหตฺวา สชฺชิตาวุธา ๘- สปริวารา กนฺตารํ ปฏิปชฺชนฺติ, เต โจรา ทูรโตว ทิสฺวา ปลายนฺติ. เต โสตฺถินา กนฺตารํ นิตฺถริตฺวา เขมนฺตํ ปตฺวา หฏฺฐตุฏฺฐา โหนฺติ. ตสฺมา ๙- กนฺตารปกฺขนฺนา ปุริสา ๙- เขมนฺตภูมึ ปตฺเถนฺติ. เทสนาปริโยสาเน ติสฺโส โสตาปตฺติผลํ ปตฺวา ปจฺฉา ปพฺพชิตฺวา อรหตฺตํ สจฺฉากาสีติ. ๑๐-

สทฺธมฺมปชฺโชติกาย มหานิทฺเทสฏฺฐกถาย

ติสฺสเมตฺเตยฺยสุตฺตนิทฺเทสวณฺณนา นิฏฺฐิตา.

สตฺตมํ.