สทฺธึ ยุคสมาคมาติ ๑- เอกปฺปหาเรน สทฺธึ. สมาคนฺตฺวาติ ปาปุณิตฺวา. ยุคคฺคาหํ คณฺหิตฺวาติ ยุคคฺคาหํ ปฏิภาคํ ๒- คเหตฺวา. สากจฺเฉตุนฺติ สทฺธึ กเถตุํ. สลฺลปิตุนฺติ อลฺลาปสลฺลาปํ กาตุํ. สากจฺฉํ สมาปชฺชิตุนฺติ สทฺธึ กถนํ ปฏิปชฺชิตุํ. น ปฏิพลภาเว จ การณํ ทสฺเสตุํ "ตํ กิสฺส เหตุ, ปสูโร ปริพฺพาชโก หีโน"ติอาทิมาห. โส หิ ภควา อคฺโค จาติ อสทิสตฺตา ๓- อสมานปญฺญตฺตา อคฺโค จ. เสฏฺโฐ จาติ สพฺพคุเณหิ อปฺปฏิสมฏฺเฐน อปฺปฏิสมฏฺเฐน เสฏฺโฐ จ. โมกฺโข จาติ สวาสเนหิ กิเลเสหิ มุตฺตตฺตา โมกฺโข จ. อุตฺตโม จาติ อตฺตโน อุตฺตริตรวิรหิตตฺตา อุตฺตโม จ. ปวโร จาติ สพฺพโลเกน อภิปตฺถนียตฺตา ปวโร จ. มตฺเตน มาตงฺเคนาติ ปภินฺนมเทน หตฺถินา.

โกตฺถุโกติ ชีรณสิคาโล. ๔- สีเหน มิครญฺญา สทฺธินฺติ เกสรสีเหน มิคราเชน สห. ตรุณโกติ ฉาปโก. เธนุปโกติ ขีรปโก. อุสเภนาติ มงฺคลสมฺมเตน อุสเภน. วลกกุนา ๕- สทฺธินฺติ วลมานกกุนา ๖- สทฺธึ. ธงฺโกติ กาโก. ครุเฬน เวนเตยฺเยน สทฺธินฺติ เอตฺถ ครุเฬนาติ ชาติวเสน นามํ. เวนเตยฺเยนาติ โคตฺตวเสน. จณฺฑาโลติ ชจฺจจณฺฑาโล. ๗- รญฺญา จกฺกวตฺตินาติ จาตุทฺทีปิกจกฺกวตฺตินา. ปํสุปิสาจโกติ กจวรฉฑฺฑนฏฺฐาเน นิพฺพตฺโต ยกฺโข. อินฺเทน เทวรญฺญา สทฺธินฺติ สกฺเกน เทวราเชน สห. โส หิ ภควา มหาปญฺโญติอาทีนิ ฉปฺปทานิ เหฏฺฐา วิตฺถาริตานิ. ตตฺถ ปญฺญาปเภทกุสโลติ อตฺตโน อนนฺตวิกปฺเป ปญฺญาปเภเท เฉโก. ปภินฺนญาโณติ อนนฺตปฺปเภทปตฺตญาโณ. เอเตน ปญฺญาปเภทกุสลตฺเตปิ สติ ตาสํ ปญฺญานํ อนนฺตเภทตฺตํ ทสฺเสติ. อธิคตปฏิสมฺภิโทติ ปฏิลทฺธอคฺคจตุปฏิสมฺภิทญาโณ. จตุเวสารชฺชปฺปตฺโตติ จตฺตาริ วิสารทภาวสงฺขาตานิ ญาณานิ ปตฺโต. ยถาห:-

@๔ ฉ.ม. ชิรณสิงฺคาโล ๕ สี.ฉ.ม. จลกกุนา ๖ ฉ.ม. จลมานกกุนา ๗ ฉ.ม. ฉวจณฺฑาโล