ตํ ตํ ปจฺจยํ ปฏิจฺจ อุปฺปนฺโนติ ปจฺจุปฺปนฺโน. รตฺโตติ นุปสงฺเขยฺโยติ ราเคน รตฺโตติ คณนํ น อุปเนตพฺโพ. อุปริปิ เอเสว นโย. เอวํรูโป ๑- สิยนฺติอาทีสุปิ ปณีตมนุญฺญรูปาทิวเสเนว ตณฺหาทิฏฺฐิปฺปวตฺตนสงฺขาตา นนฺที สมนฺนานยนา เวทิตพฺพา. น ปณิทหตีติ ปตฺถนาวเสน น ฐเปติ. อปฺปณิธานปจฺจยาติ น ปตฺถนาฐปนการเณน.

[๘๕] อสนฺตาสีติ เตน เตน อลาภโต อสนฺตสนฺโต. อวิกตฺถีติ สีลาทีหิ อวิกตฺถนสีโล. อกุกฺกุจฺโจติ หตฺถกุกฺกุจฺจาทิวิรหิโต. มนฺตภาณีติ มนฺตาย ปริคฺคเหตฺวา วาจํ ภาสิตา. อนุทฺธโตติ อุทฺธจฺจวิรหิโต. ส เว วาจายโตติ โส วาจาย ยโต สญฺญโต จตุโทสวิรหิตํ วาจํ ภาสิตา โหติ.

อกฺโกธโนติ ยํ หิ โข วุตฺตนฺติ "น โกธโน อกฺโกธโน โกธวิรหิโต"ติ ยํ กถิตํ, ตํ ปฐมํ ตาว โกธํ กเถตุกาโม "อปิ จ โกโธ ตาว วตฺตพฺโพ"ติ อาห. โกโธ ตาว วตฺตพฺโพติ ปฐมํ โกโธ กเถตพฺโพ. ทสหากาเรหิ โกโธ ชายตีติ ทสหิ การเณหิ โกโธ อุปฺปชฺชติ. อนตฺถํ เม อจรีติ อวุฑฺฒึ เม อกาสิ, อิมินา อุปาเยน สพฺพปเทสุ อตฺโถ เวทิตพฺโพ. อฏฺฐาเน วา ปน โกโธ ชายตีติ อการเณ โกโธ อุปฺปชฺชติ. เอกจฺโจ หิ "เทโว อติวสฺสตี"ติ กุปฺปติ, "น วสฺสตี"ติ กุปฺปติ, "สูริโย ตปฺปตี"ติ กุปฺปติ, "น ตปฺปตี"ติ กุปฺปติ, วาเต วายนฺเตปิ กุปฺปติ, อวายนฺเตปิ กุปฺปติ, สมฺมชฺชิตุํ อสกฺโกนฺโต โพธิปณฺณานํ กุปฺปติ, จีวรํ