โกธสฺส วิสมูลสฺส มธุรคฺคสฺส พฺราหฺมณ

วธํ อริยา ปสํสนฺติ ตํ หิ เฉตฺวา น โสจตี"ติ. ๑-

ยโตติ ยทา. ปรปุคฺคลํ ฆาเตตฺวาติ ปรปุคฺคลํ ๒- นาเสตฺวา. อตฺตานํ ฆาเตตีติ อตฺตานํ มาเรติ. ปรมุสฺสทคโตติ อติพลวภาวํ คโต. ปรมเวปุลฺลปฺปตฺโตติ อติวิปุลภาวํ ปตฺโต. โกธสฺส ปหีนตฺตาติ อนาคามิมคฺเคน วุตฺตปฺปการสฺส โกธสฺส ปหีนภาเวน. โกธวตฺถุสฺส ปริญฺญาตตฺตาติ โกธสฺส ปติฏฺฐาภูตสฺส การณภูตสฺส ปิยาปิยอฏฺฐานสงฺขาตสฺส วตฺถุสฺส ญาตตีรณปริญฺญาหิ พฺยาเปตฺวา ญาตภาเวน. โกธเหตุสฺส อุปจฺฉินฺนตฺตาติ โกธสฺส ชนกเหตุโน โทมนสฺสสหคตจิตฺตุปฺปาทสฺส อุจฺฉินฺนภาเวน.

ตาสีติ ภายนสีโล โหติ. อุตฺตาสีติ อติภายนสีโล. ปริตฺตาสีติ สมนฺตโต ภายนสีโล. ภายตีติ ภยํ อาปชฺชติ. ๓- สนฺตาสํ อาปชฺชตีติ วิรูปภาวํ ปาปุณาติ. กตฺถี โหตีติ อตฺตโน วณฺณภณนสีโล โหติ. วิกตฺถีติ วิวิธา นานปฺปการโต วณฺณภณนสีโล. ชาติยา วาติ ขตฺติยภาวาทิชาติสมฺปตฺติยา วา. โคตฺเตน วาติ โคตมโคตฺตาทินา อุกฺกฏฺฐโคตฺเตน วา. โกลปุตฺติเยน วาติ มหากุลภาเวน วา. วณฺณโปกฺขรตาย วาติ วณฺณสมฺปนฺนสรีรตาย วา. สรีรญฺหิ "โปกฺขรนฺ"ติ วุจฺจติ, ตสฺส วณฺณสมฺปตฺติยา อภิรูปภาเวนาติ อตฺโถ. ธเนน วาติอาทีนิ อุตฺตานตฺถาเนว.