ญาณมฺปิ ญาณปโถติ ปุเร อุปฺปนฺนญาณํ อปราปรุปฺปนฺนสฺส ญาณมฺปิ ญาณสฺส สญฺจรณมคฺโคติ ญาณมฺปิ ญาณปโถ. ญาณสฺส อารมฺมณมฺปิ ญาณปโถติ ญาณสฺส ปจฺจโยปิ ตํ อาลมฺพิตฺวา อุปฺปชฺชนโต ญาณปโถ. ญาณสหภุโนปิ ธมฺมา ญาณปโถติ ญาเณน สหุปฺปนฺนา อวเสสา จิตฺตเจตสิกา ธมฺมาปิ ญาณปโถ. อิทานิ อุปมาย สาเธนฺโต "ยถา อริยมคฺโค อริยปโถ"ติอาทิมาห.

กถํกถี ปุคฺคโลติ วิจิกิจฺฉาวนฺโต ปุคฺคโล. สกงฺโขติ สเทฺวฬฺหโก. สวิเลโขติ จิตฺตราชิวนฺโต. สเทฺวฬฺหโกติ กงฺขาวนฺโต. สวิจิกิจฺโฉติ สนฺเทหวนฺโต. ญาณาธิคมายาติ ญาณปฏิลาภตฺถาย. ญาณผุสนายาติ ๒- ญาณปฏิวิชฺฌนตฺถาย. อถ วา ญาณวินฺทนตฺถาย. ๓- ญาณสจฺฉิกิริยายาติ ญาณสฺส ปจฺจกฺขกรณตฺถาย. สนิทานาหนฺติ อหํ สนิทานํ สปฺปจฺจยํ กตฺวา ธมฺมเทสนํ กโรมิ. สปฺปาฏิหาริยนฺติ นิยฺยานิกํ กตฺวา. โน อปฺปาฏิหาริยนฺติ อนิยฺยานิกํ อกตฺวา ธมฺมเทสนํ กโรมิ.

[๑๐๔] สาตํ อสาตญฺจ กุโตนิทานาติ เอตฺถ สาตาสาตนฺติ สุขทุกฺขเวทนา เอว อธิปฺเปตา. น ภวนฺติ เหเตติ น ภวนฺติ หิ ๔- เอเต. วิภวํ ภวญฺจาปิ ยเมตมตฺถํ, เอตํ เม ปพฺรูหิ ยโตนิทานนฺติ สาตาสาตานํ วิภวํ ภวญฺจ เอตมฺปิ