อปฺปกนฺติ มนฺทํ. ปริตฺตกนฺติ โถกํ. โอมกนฺติ เหฏฺฐิมกํ. ลามกนฺติ ปาปกํ. สมายาติ ราคาทีนํ สมนตฺถาย. อุปสมายาติ อุปรูปริ สมนตฺถาย. วูปสมายาติ สนฺนิสีทาปนตฺถาย. นิพฺพานายาติ อมตมหานิพฺพานตฺถาย. ปฏินิสฺสคฺคายาติ มคฺเคน กิเลสานํ นิสฺสชฺชนตฺถาย. ปฏิปสฺสทฺธิยาติ ผเลน ปฏิปสฺสทฺธานํ อนุปฺปชฺชนตฺถาย นาลํ.

[๑๓๒] เอวํ หิ อวิวาทมาโน:- ยา กาจิมาติ คาถา. ตตฺถ สมฺมติโยติ ๑- ทิฏฺฐิโย. ปุถุชฺชาติ ปุถุชฺชนสมฺภวา. โส อุปยํ กิเมยฺยาติ โส อุปคนฺตพฺพฏฺเฐน อุปยํ รูปาทีสุ เอกมฺปิ ธมฺมํ กึ อุเปยฺย, เกน วา การเณน อุเปยฺย. ทิฏฺเฐ สุเต ขนฺติมกุพฺพมาโนติ ทิฏฺฐสุตสุทฺธีสุ ขนฺตึ ๒- อกโรนฺโต.

ปุถุชฺชเนหิ ชนิตา วาติ ปุถุชฺชเนหิ อุปฺปาทิตา วา. ตา สมฺมุติโยติ เอตา ทิฏฺฐิโย. ปุถุ นานาชเนหิ ชนิตา วาติ อเนกวิเธหิ ทิฏฺฐิคติเกหิ อุปฺปาทิตา วา. เนตีติ น เอติ. น อุเปตีติ สมีปํ น เอติ. น อุปคจฺฉตีติ นิวตฺตติ. นาภินิวิสตีติ ปวิสิตฺวา น ปติฏฺฐาติ. ๓-