นานตฺตกถาติ ปุริมปจฺฉิมกถาหิ วิมุตฺตา อวเสสา นานาสภาวา นิรตฺถกกถา. โลกกฺขายิกาติ อยํ โลโก เกน นิมฺมิโต? อสุเกน นาม นิมฺมิโต. กาโก เสโต อฏฺฐีนํ เสตตฺตา, พลากา รตฺตา โลหิตสฺส รตฺตตฺตาติ เอวมาทิกา โลกายตวิตณฺฑสลฺลาปกถา.

สมุทฺทกฺขายิกา นาม กสฺมา สมุทฺโท สาคโร? สาครเทเวน ขตตฺตา สาคโร, "ขโต เม"ติ หตฺถมุทฺธาย สยํ นิเวทิตตฺตา สมุทฺโทติ เอวมาทิกา นิรตฺถกา สมุทฺทกฺขานกถา. ภโวติ วุฑฺฒิ. อภโวติ หานิ. อิติ ภโว อิติ อภโวติ ยํ วา ตํ วา นิรตฺถกการณํ วตฺวา ปวตฺติตกถา อิติภวาภวกถา.

อาวเรยฺยาติ อาวรณํ กเรยฺย. นิวาเรยฺยาติ อารมฺมณโต วาเรยฺย. สํวเรยฺยาติ สมฺมา นิสฺเสสํ กตฺวา วาเรยฺย. รกฺเขยฺยาติ รกฺขํ กเรยฺย. โคเปยฺยาติ สงฺโคเปยฺย. ปิทเหยฺยาติ ปิทหนํ กเรยฺย. ปจฺฉินฺเทยฺยาติ โสตํ ฉินฺเทยฺย.