มธุรวโทติอาทีสุ พฺยญฺชนสมฺปนฺนํ มธุรํ วทตีติ มธุรวโท. เปมชนกํ เปมารหํ วทตีติ เปมนียวโท. หทยงฺคมจิตฺเต ฐปนโยคฺยํ ๑- วทตีติ หทยงฺคมวโท. กรวีกสกุณสทฺโท วิย มธุรโฆโส อสฺสาติ กรวีกรุตมญฺชุโฆโส. วิสฺสฏฺโฐ จาติ อปลิพุทฺโธ ตตฺถ ตตฺถ อลคฺคมาโน. ๒- วิญฺเญยฺโย จาติ สุวิชาเนยฺโย จ. มญฺชุ จาติ มธุโร จ. สวนีโย จาติ กณฺณสุโข จ. พินฺทุ จาติ ฆโน จ. อวิสารี จาติ น ปตฺถโฏ จ. คมฺภีโร จาติ น อุตฺตาโน จ. นินฺนาทิ จาติ โฆสวนฺโต จ. อสฺสาติ อสฺส สตฺถุโน. พหิทฺธา ปริสายาติ ปริสโต พหิ. น นิจฺฉรตีติ น นิกฺขมติ. กึการณา? เอวรูโป มธุรสทฺโท นิกฺการณา มา วินสฺสตูติ. พฺรหฺมสฺสโรติ อญฺเญ ฉินฺนสฺสราปิ

ตาเรตีติ อเขมนฺตํ ฐานํ อติกฺกาเมติ. อุตฺตาเรตีติ เขมนฺตภูมึ ปาเปนฺโต ๒- ตาเรติ. นิตฺตาเรตีติ อเขมนฺตฏฺฐานโต นิกฺขาเมนฺโต ตาเรติ. ปตาเรตีติ ปริคฺคเหตฺวา ตาเรติ, หตฺเถน ปริคฺคเหตฺวา วิย ตาเรตีติ อตฺโถ. สพฺพเมตํ ตารณุตฺตารณาทิเขมนฺตฏฺฐาเน ฐปนเมวาติ อาห "เขมนฺตภูมึ สมฺปาเปตี"ติ. สตฺเตติ เวเนยฺยสตฺเต. มหาคหนตาย มหานตฺถตาย ทุนฺนิตฺถริยตาย ๓- จ ชาติเยว กนฺตาโร ชาติกนฺตาโร, ตํ ชาติกนฺตารํ.

คณสฺส สุสฺสูสตีติ คโณ อสฺส วจนํ สุสฺสูสติ สุณาติ อุปลกฺเขติ. โสตํ โอทหตีติ โสตุกมฺยตาย โสตํ อวทหติ ปติฏฺฐาเปติ. อญฺญา จิตฺตํ อุปฏฺฐเปตีติ ญาตุกามจิตฺตํ ปณิทหติ. คณํ อกุสลา วุฏฺฐาเปตฺวาติ ชนสมูหํ อโกสลฺลสมฺภูตา อกุสลา อุฏฺฐาเปตฺวา. ๔- กุสเล ปติฏฺฐาเปตีติ โกสลฺลสมฺภูเต กุสเล ฐเปติ. สงฺฆีติ ราสิวเสน สงฺโฆ อสฺส อตฺถีติ สงฺฆี. ปริสวเสน คโณ อสฺส อตฺถีติ คณี. คณสฺส อาจริโยติ คณาจริโย.