[๑๙๕] ฉฏฺฐคาถาย กตี ปริสฺสยาติ กิตฺตกา อุปทฺทวา. อคตํ ทิสนฺติ นิพฺพานํ. ตํ หิ อคตปุพฺพตฺตา อคตํ, นิทฺทิสิตพฺพโต ทิสา จาติ. เตน วุตฺตํ "อคตํ ทิสนฺ"ติ. "อมตํ ทิสนฺ"ติปิ ปาโฐ. อภิสมฺภเวติ อภิสมฺภเวยฺย. ปนฺตมฺหีติ ปริยนฺเต.

อคตปุพฺพา สา ทิสาติ ยา ทิสา สุปินนฺเตนปิ อคตปุพฺพา. ๔- น สา ทิสา คตปุพฺพาติ เอสา ทิสา วุตฺตนเยน อคตปุพฺพา. อิมินา ทีเฆน อทฺธุนาติ อเนน ทีฆกาเลน.

สมติตฺติกนฺติ อนฺโตมุขวฏฺฏิเลขํ ปาเปตฺวา สมภริตํ. อนวเสกนฺติ อนวสิญฺจนกํ อปริสิญฺจนกํ กตฺวา. เตลปตฺตนฺติ ปกฺขิตฺตเตลํ เตลปตฺตํ. ปริหเรยฺยาติ หเรยฺย