2. Guhaṭṭhakasuttaniddesavaṇṇanā

[7] Dutiye:- sattoti laggo. Guhāyanti kāye. Kāyo hi rāgādīnaṃ vāḷānaṃ vasanokāsato "guhā"ti vuccati. Bahunābhichannoti bahunā rāgādikilesajātena abhicchanno. Etena ajjhattabandhanaṃ vuttaṃ. Tiṭṭhanti rāgādivasena tiṭṭhanto. Mohanasmiṃ pagāḷhoti mohanaṃ vuccati kāmaguṇo. Ettha hi devamanussā muyhanti tesu ajjhogāḷhā hutvā. Etena bāhirabandhanaṃ vuttaṃ. Dūre vivekā hi tathāvidho soti so tathārūpo naro tividhāpi kāyavivekādikā vivekā dūre anāsanne. Kiṃkāraṇā? kāmā hi loke na hi suppahāyāti yasmā loke kāmā suppahāyā Na honti, tasmāti vuttaṃ hoti.

Sattoti hi kho vuttanti satto, naro, mānavoti evamādinā nayena kathitoyeva. Guhāyanti guhā tāva vattabbāti guhā tāva kathetabbā. Kāyoti vātiādīsu ayaṃ tāva padayojanā:- kāyoiti vā guhāiti vā .pe. Kumbhoiti vāti. Tattha kāyoti "kucchitānaṃ āyoti kāyo"tiādinā heṭṭhā satipaṭṭhānakathāyaṃ vuttoyeva. Rāgādivāḷānaṃ vasanokāsaṭṭhena guhā, "paṭicchādanaṭṭhenā"tipi eke. "dūraṅgamaṃ ekacaraṃ, asarīraṃ guhāsayan"tiādīsu viya. Rāgādīhi jhāpanaṭṭhena deho "te hitvā mānusaṃ dehan"tiādīsu viya. Pamattakaraṇaṭṭhena sandeho "bhijjati pūtisandeho, maraṇantaṃ hi jīvitan"tiādīsu viya. Saṃsāre sañcaraṇaṭṭhena nāvā "siñca bhikkhu imaṃ nāvaṃ, sittā te lahumessatī"tiādīsu viya. Iriyāpathassa atthibhāvaṭṭhena ratho "ratho sīlaparikkhāro, jhānakkho cakkavīriyo"tiādīsu viya. Accuggataṭṭhena dhajo "dhajo rathassa paññāṇan"tiādīsu viya.