Jātidukkhanti jātisaddassa tāva aneke atthā paveditā. Yathā:-

bhavo kulaṃ nikāyo ca sīlaṃ paññatti lakkhaṇaṃ

pasūti sandhi cevāti jātiatthā paveditāti.

Tathā hissa "ekampi jātiṃ dvepi jātiyo"tiādīsu bhavo attho. "akkhitto anupakkuṭṭho jātivādenā"ti ettha kulaṃ. "atthi visākhe nigaṇṭhā nāma samaṇajātī"ti ettha nikāyo. "yatohaṃ bhagini ariyāya jātiyā jāto nābhijānāmī"ti ettha ariyasīlaṃ. "tiriyā nāma tiṇajāti nābhiyā uggantvā nabhaṃ āhacca ṭhitā ahosī"ti ettha paññatti. "jāti dvīhi khandhehi saṅgahitā"ti ettha saṅkhatalakkhaṇaṃ. "sampatijāto ānanda bodhisatto"ti ettha pasūti. "bhavapaccayā jātī"ti ca, "jātipi dukkhā"ti ca ettha pariyāyato paṭisandhikkhaṇo, nippariyāyato pana tattha tattha nibbattamānānaṃ sattānaṃ ye ye khandhā pātubhavanti, tesaṃ tesaṃ paṭhamapātubhāvo jāti nāma.