Tattha anekatthavattā sandhāyabhāsito "mātaraṃ pitaraṃ hantvā, rājāno dve ca khattiye"ti evamādi. Ekatthavattā byañjanabhāsito "manopubbaṅgamā dhammā"ti evamādi. Sāvaseso "sabbaṃ bhikkhave ādittan"ti evamādi. Viparīto anavaseso "sabbe dhammā sabbākārena buddhassa bhagavato ñāṇamukhe āpāthaṃ āgacchantī"ti evamādi. Yathā vacanaṃ, tathā avagantabbo nīto "aniccaṃ dukkhamanattā"ti evamādi. Yuttiyā anussaritabbo neyyo "ekapuggalo bhikkhave"ti evamādi.

Attho pana anekappakāro pāṭhattho sabhāvattho ñāyattho pāṭhānurūpo na pāṭhānurūpo sāvasesattho niravasesattho nītattho neyyattho iccādi. Tattha yo appassatthassa ñāpanatthamuccāriyate, so pāṭhattho "sātthaṃ sabyañjanan"tiādīsu viya. Rūpārūpadhammānaṃ lakkhaṇarasādisabhāvattho "sammādiṭṭhiṃ bhāvetī"tiādīsu viya. Yo ñāyamāno hitāya saṃvattati, so ñātuṃ arahatīti ñāyattho "atthavādī dhammavādī"tiādīsu viya. Yathāpāṭhaṃ bhāsito pāṭhānurūpo "cakkhu bhikkhave purāṇakamman"ti bhagavatā vuttaṃ. Tasmā cakkhupi kammanti. Byañjanacchāyāya atthaṃ paṭibāhayamānena vutto attho na pāṭhānurūpo, so pāṭhato ananuññāto akatapaṭikkhepo viyutto. So ca saṅgahetabbampi asaṅgahetvā, parivajjetabbampi vā kiñci aparivajjetvā parisesaṃ katvā vutto sāvasesattho "cakkhuñca paṭicca rūpe ca uppajjati cakkhuviññāṇaṃ. Sabbe tasanti daṇḍassa, sabbe bhāyanti maccuno"tiādīsu viya. Viparīto niravasesattho "sandhāvitaṃ saṃsaritaṃ mamañceva tumhākañca. Tatra bhikkhave ko mantā ko saddhātā .pe. Aññatra diṭṭhapadehī"tiādīsu viya. Saddavaseneva veditabbo

@3 khu.dha. 25/1/15 4 vi.mahā. 4/54/44, saṃ.saḷā. 18/31/23 (syā)