@4 khu.dha. 25/148/43 5 khu.dha. 25/369/81

@6 saṃ.mahā. 19/4/5 7 khu.jā. 28/1841/326

Kimikulānaṃ āvāsabhāvena vammiko "vammikoti kho bhikkhu imassetaṃ cātummahābhūtikassa kāyassa adhivacanan"tiādīsu viya. Yatheva hi bāhirako vammiko, vamatīti vantakoti vantussayoti vantasinehasambandhoti catūhi kāraṇehi "vammiko"ti vuccati. So hi ahinakulaundūragharagoḷikādayo nānappakāre pāṇake vamatīti vammiko. Upacikāhi vantakoti vammiko. Upacikāhi vametvā mukhatuṇḍakehi ukkhittapaṃsucuṇṇena kaṭippamāṇenapi purisappamāṇenapi ussitoti vammiko. Upacikāhi vantakheḷasinehena ābandhatāya sattasattāhaṃ deve vassantepi na vippakirīyati, nidāghepi tato paṃsumuṭṭhiṃ gahetvā tasmiṃ muṭṭhinā pīḷiyamāne sineho nikkhamati, evaṃ vantasinehasambandhoti vammiko, evamayaṃ kāyopi "akkhimhā aggigūthako"tiādinā nayena nānappakāraṃ asucikalalaṃ vamatīti vammiko. Buddhapaccekabuddhakhīṇāsavā imasmiṃ attabhāve nikantipariyādānena attabhāvaṃ chaḍḍetvā gatāti ariyehi vantakotipi vammiko. Yopi cāyaṃ tīhi aṭṭhisatehi ussito nhārusambandho maṃsāvalepano allacammapariyonaddho chavirañjito satte vañceti, taṃ sabbaṃ ariyehi vantamevāti vantussayotipi vammiko. "taṇhā janeti purisaṃ, cittamassa vidhāvatī"ti evaṃ taṇhāya janitattā ariyehi vanteneva taṇhāsinehena sambandho ayanti vantasinehasambandhotipi vammiko. Yathāpi vammikassa anto nānappakārā pāṇakā tattheva jāyanti, uccārapassāvaṃ karonti, gilānā sayanti, matā papatanti. Iti so tesaṃ pasūtigharaṃ vaccakuṭigilānasālā susānañca hoti, evaṃ khattiyamahāsālādīnampi kāyo "ayaṃ gopitarakkhito maṇḍitapasādito mahānubhāvānaṃ kāyo"ti acintetvā chavinissitā pāṇā cammanissitā pāṇā maṃsanissitā pāṇā nhārunissitā pāṇā aṭṭhinissitā pāṇā aṭṭhimiñjanissitā pāṇāti evaṃ kulagaṇanāya asītimattāni kimikulasahassāni antokāyasmiṃyeva jāyanti, uccārapassāvaṃ karonti, gelaññena āturitāni sayanti, matāmatā nipatanti.