[8] Evaṃ paṭhamagāthāya "dūre vivekā hi tathāvidho"ti sādhetvā puna tathāvidhānaṃ sattānaṃ dhammataṃ āvikaronto "icchānidānā"tiādigāthamāha. Tattha icchānidānāti taṇhāhetukā. Bhavasātabandhāti sukhavedanādimhi bhavasātena bandhā. Te duppamuñcāti te bhavasātavatthubhūtā dhammā. Te vā tattha bandhā icchānidānā sattā duppamocayā. Na hi aññamokkhāti aññe ca pamocetuṃ na sakkonti. Kāraṇavacanaṃ vā etaṃ. Te sattā duppamuñcā. Kasmā? yasmā aññena mocetabbā Na honti. Yadi sattā muñceyyuṃ, sakena thāmena muñceyyunti ayamassa attho. Pacchā pure vāpi apekkhamānāti anāgate atīte vā kāme apekkhamānā. Imeva kāme purimeva jappanti ime vā paccuppanne kāme purime vā duvidhepi atītānāgate balavataṇhāya patthayamānā. Imesañca dvinnaṃ padānaṃ "te duppamuñcā na hi aññamokkhā"ti imināva saha sambandho veditabbo. Itarathā apekkhamānāpi jappaṃ kiṃ karonti, kiṃ vā katāti na paññāyeyyuṃ.

Bhavasātabandhāti bhave sātaṃ bhavasātaṃ, tena bhavasātena sukhassādena bandhā hutvā ṭhitā. Taṃ bhājetvā dassetuṃ "ekaṃ bhavasātaṃ:- sukhā vedanā"tiādimāha. Yobbanassa bhāvo yobbaññaṃ. Rogassa abhāvo ārogyaṃ. Jīvitindriyassa pavattabhāvo jīvitaṃ. Lābhoti catunnaṃ paccayānaṃ lābho. Yasoti parivāro. Pasaṃsāti kitti. Sukhanti kāyikacetasikaṃ sukhaṃ. Manāpikā rūpāti manavaḍḍhanakā rūpā. Sesesupi eseva nayo.

Cakkhusampadāti cakkhussa sampadā. "mayhaṃ cakkhusampannaṃ maṇivimāne ugghāṭitasīhapañjaraṃ viya khāyatī"ti uppannaṃ sukhassādaṃ sandhāya "cakkhusampadā"ti vuttaṃ. Sotasampadādīsupi eseva nayo. Sukhāya vedanāya sātabandhā .pe. Vibandhāti mūlapadaṃ. Vinibandhāti vividhākārena bandhā. Ābandhāti visesena ādito bandhā.

Laggitāti nāgadante phāṇitavārako viya laggitā. Yamettha ca avuttaṃ, taṃ satto visattotiādimhi vuttanayena gahetabbaṃ.