Giddhāti kāmarāgena giddhā. Gadhitāti saṅkapparāgena paccāsiṃsamānā hutvā gadhitā. Mucchitāti kāmataṇhāya mucchāparetā. Ajjhopannāti kāmanandiyā adhiopannā ajjhotthaṭā. Laggāti kāmasinehena allīnā. Laggitāti kāmapariḷāhena ekībhūtā. Palibuddhāti kāmasaññāya āvaṭṭitā. Atha vā "diṭṭhidassane giddhā. Abhiṇhadassane gadhitā. Saṃsaggakiriyasmiṃ mucchitā. Vissāsakiriyasmiṃ ajjhopannā. Sinehavalañjasmiṃ laggā. Dvayandvayasamāpattimhi laggitā. Aparāparaṃ amuñcamānā hutvāva palibuddhā"ti evameke vaṇṇayanti.

Esantīti paccāsiṃsanti. Gavesantīti maggayanti. Pariyesantīti sabbākārena icchanti patthenti. Atha vā diṭṭhārammaṇe subhāsubhaṃ atthi, natthīti esanti.

@adhiosannā Subhāsubhārammaṇe paccakkhaṃ katvā valañjanatthāya piyaṃ karontā gavesanti. Cittavasena esanti. Saṃyogavasena gavesanti. Karaṇavasena pariyesanti. Te duvidhe kāme paṭicca otaritvā carantīti taccaritā. Teva kāme bahulaṃ yebhuyyena vaḍḍhenti pavattayantīti tabbahulā. Teva kāme garukatvā dahantīti taggarukā. Tesu kāmesu ninnā namitā hutvā vasantīti tanninnā. Tesu kāmesu bhattimā hutvā vasantīti tappoṇā. Tesu kāmesu avalambitā hutvā tesuyeva namitā vasantīti tappabbhāRā. Tesu kāmesu avattharitvā mucchāparetappasaṅgā hutvā carantīti tadadhimuttā. Teva kāme adhipatiṃ jeṭṭhaṃ katvā carantīti tadādhipateyyā. Atha vā "ārammaṇassa iṭṭhabhāvena taccaritā. Ārammaṇassa kantabhāvena tabbahulā. Ārammaṇassa manāpabhāvena taggarukā. Ārammaṇassa piyabhāvena tanninnā. Ārammaṇassa kāmūpasañhitabhāvena tappoṇā. Ārammaṇassa rajanīyabhāvena tappabbhāRā. Ārammaṇassa mucchanīyabhāvena tadadhimuttā. Ārammaṇassa bandhanīyabhāvena tadādhipateyyā"ti evameke vaṇṇayanti.