"tatra paṭipadāvisuddhi nāma sasambhāriko upacāro. Upekkhānubrūhanā nāma appanā. Sampahaṃsanā nāma paccavekkhaṇā"ti evameke vaṇṇayanti. Yasmā pana "ekaggacittaṃ paṭipadāvisuddhilakkhaṇañceva hoti upekkhānubrūhitañca ñāṇena ca sampahaṃsitan"ti pāḷiyaṃ vuttaṃ, tasmā antoappanāyameva āgamanavasena paṭipadāvisuddhi, tatramajjhattupekkhāya kiccavasena upekkhānubrūhanā, dhammānaṃ anativattanādibhāvasādhanena pariyodāpakassa ñāṇassa kiccanipphattivasena sampahaṃsanā ca veditabbā.

Kathaṃ? yasmiṃ hi vāre appanā uppajjati, tasmiṃ yo nīvaraṇasaṅkhāto Kilesagaṇo tassa jhānassa paripantho, tato cittaṃ visujjhati. Visuddhattā āvaraṇavirahitaṃ hutvā majjhimaṃ samathanimittaṃ paṭipajjati. Majjhimaṃ samathanimittaṃ nāma samappavatto appanāsamādhiyeva. Tadanantaraṃ pana purimaṃ cittaṃ ekasantatipariṇāmanayena tathattaṃ upagacchamānaṃ majjhimaṃ samathanimittaṃ paṭipajjati nāma, evaṃ paṭipannattā tathattupagamanena tattha pakkhandati nāma. Evaṃ tāva purimacitte vijjamānākāranipphādikā paṭhamajjhānassa uppādakkhaṇeyeva āgamanavasena paṭipadāvisuddhi veditabbā.

@3 Sī.,cha.Ma. ekattagataṃ cittaṃ 4 cha.Ma. paṭipadāvisuddhipakkhandañceva