@veditabbā 4 abhi.A. 2/194 5 cha.Ma. asaññasatte
@6 Sī.,cha.Ma. paṭhamasamāpannasamāpattibalaṃ Arūpadhammassa attano pavattiṭṭhāne rūpapavattiyā padhānakāraṇabhāvena ekacittasamāyuttāti cittappadhānabhāvo kathitoti veditabbo.
Evaṃ pañcavokārabhave pavattiyaṃ rūpappavattippadhānabhūtacittanirodhena rūpe dharamāneyeva sattānaṃ nirodho nāma hotīti arūpadhammavasena eva "lahuso vattate khaṇo"ti vuttaṃ. Atha vā pañcavokārabhave cuticittaṃ sandhāya kathitāti veditabbā. Evaṃ kathiyamāne sukhadukkhā cāti kāyikacetasikasukhavedanā ca kāyikacetasikadukkhavedanā ca cuticittakkhaṇe ahontīpi ekasantativasena cuticittena saddhiṃ nirujjhatīti kathitā. Catuvokārabhavaṃ vā sandhāya kathitātipi veditabbā. Kathaṃ? aññasmiṃ ṭhāne attabhāvoti Saññākkhandhassa vuttabhāvena attabhāvoti saññākkhandhova gahito. Brahmaloke kāyikasukhadukkhadomanassaṃ ahontampi sukhadukkhā cāti vedanāsāmaññato labbhamāno vedanākkhandho gahitoti veditabbaṃ. Sesaṃ vuttasadisameva. Imesu ca tīsu vikappesu kevalāti dhuvasukhasubhaattā natthi, kevalaṃ tehi avomissā. Lahuso vattati khaṇoti vuttanayena ekacittakkhaṇikatāya lahuko atiparitto jīvitādīnaṃ khaṇo vattati.