Taṇhānugatanti taṇhāya anupaviṭṭhaṃ. Taṇhāyānusaṭanti taṇhāya anupatthaṭaṃ. Taṇhāyāpannanti taṇhāya nimuggaṃ. Taṇhāya pātitanti taṇhāya khittaṃ. "paripātitan"ti vā pāṭho. Abhibhūtanti taṇhāya madditaṃ ajjhotthaṭaṃ. Pariyādinnacittanti khepetvā gahitacittaṃ. Atha vā oghena gataṃ viya taṇhāgataṃ. Upādinnakarūpapaccayehi patitvā gataṃ viya taṇhānugataṃ. Udakapiṭṭhiṃ chādetvā patthaṭanīlikā udakapiṭṭhi viya taṇhānusaṭaṃ. Vaccakūpe nimuggaṃ viya taṇhāyāpannaṃ. Rukkhaggato patitvā narake patitaṃ viya taṇhāya pātitaṃ. Upādinnakarūpasaṃyogaṃ viya taṇhāya abhibhūtaṃ. Upādinnakarūpapariggāhakassa uppannavipassanaṃ viya taṇhāya pariyādinnacittaṃ. Atha vā kāmacchandena taṇhāgataṃ. Kāmapipāsāya taṇhānugataṃ. Kāmāsavena taṇhānusaṭaṃ. Kāmapariḷāhena taṇhāyāpannaṃ. Kāmajjhosānena taṇhāya pātitaṃ. Kāmoghena taṇhāya abhibhūtaṃ. Kāmupādānena taṇhāya pariyādinnacittanti evameke

@cha.Ma. taṇhāyāsannanti. evamuparipi Vaṇṇayanti. Kāmabhaveti kāmāvacare. Rūpabhaveti rūpāvacare. Arūpabhaveti arūpāvacare. Tesaṃ nānattaṃ heṭṭhā pakāsitaṃyeva.

Bhavābhavesūti bhavābhaveti bhavoti kāmadhātu. Abhavoti rūpārūpadhātu. Atha vā bhavoti kāmadhātu rūpadhātu. Abhavoti arūpadhātu. Tesu bhavābhavesu. Kammabhaveti kammavaṭṭe. Punabbhaveti ponobbhavike vipākavaṭṭe. Kāmabhaveti kāmadhātuyā. Kammabhaveti kammavaṭṭe. Tattha kammabhavo bhāvayatīti bhavo. Kāmabhave punabbhaveti kāmadhātuyā upapattibhave vipākavaṭṭe. Vipākabhavo bhavatīti bhavo. Rūpabhavādīsupi eseva nayo. Ettha ca "kāmabhave rūpabhave arūpabhave"ti okāsabhavaṃ sandhāya vuttaṃ. Tīsupi "kammabhave"ti kammabhavaṃ, tathā "punabbhave"ti upapattibhavaṃ sandhāya vuttaṃ. Punappunaṃ bhaveti aparāparaṃ uppattiyaṃ. Gatiyāti pañcagatiyā aññatarāya. Attabhāvābhinibbattiyāti attabhāvānaṃ abhinibbattiyaṃ. Avītataṇhāti mūlapadaṃ. Avigatataṇhāti khaṇikasamādhi viya khaṇikappahānābhāvena na vigatā taṇhā etesanti avigatataṇhā. Accattataṇhāti tadaṅgappahānābhāvena apariccattā taṇhāti accattataṇhā. Avantataṇhāti vikkhambhanappahānābhāvena na vamitā taṇhāti avantataṇhā. Amuttataṇhāti accantasamucchedappahānābhāvena na muttā taṇhāti amuttataṇhā. Appahīnataṇhāti paṭipassaddhippahānābhāvena na pahīnā taṇhāti appahīnataṇhā. Appaṭinissaṭṭhataṇhāti nissaraṇappahānābhāvena bhave patiṭṭhitaṃ accantasaṅkilesaṃ appaṭinissajjitvā ṭhitattā appaṭinissaṭṭhataṇhāti.