[12] Idāni yasmā avigatataṇhāeva phandanti ca lapanti ca, tasmā taṇhāvinaye samādapento "mamāyite"ti gāthamāha. Tattha mamāyiteti taṇhādiṭṭhimamattehi "maman"ti pariggahite vatthusmiṃ. Passathāti sotāre ālapanto āha. Etampīti etampi ādīnavaṃ. Sesaṃ pākaṭameva.

@4 cha.Ma. anusayakilesaṃ 5 cha.Ma....evaṃ

Dve mamattāti dve ālayā. Yāvatāti paricchedaniyamanatthe nipāto. Taṇhāsaṅkhātenāti taṇhākoṭṭhāsena, saṅkhā saṅkhātanti atthato ekaṃ "saññānidānā hi papañcasaṅkhā"tiādīsu viya. Sīmakatanti aparicchedadosavirahitaṃ mariyādakataṃ "tiyojanaparamaṃ sīmaṃ sammannitun"tiādīsu viya. Odhikatanti vacanaparicchedadosavirahitaṃ paricchedakatasīmantarikarukkho viya. Pariyantakatanti paricchedakataṃ. Sīmantarikarukkho pana dvinnaṃ sādhāraṇaṃ, ayaṃ pana ekābaddhatālapanti viya katanti pariyantakataṃ. Pariggahitanti kālantarepi parāyattaṃ muñcitvā sabbākārena gahitaṃ. Mamāyitanti ālayakataṃ vassūpagataṃ senāsanaṃ viya. Idaṃ mamanti samīpe ṭhitaṃ. Etaṃ mamanti dūre ṭhitaṃ. Ettakanti parikkhāraniyamanaṃ "ettakampi nappaṭibhāseyyā"ti viya. Ettāvatāti paricchedatthepi nipātaniyamanaṃ "ettāvatā kho mahānāmā"ti viya. Kevalampi mahāpaṭhavinti sakalampi mahāpaṭhaviṃ.