Catubbidhena māno lokadhammavasena vutto. Pañcavidhena māno pañcakāmaguṇavasena vutto. Chabbidhena māno cakkhvādisampattivasena vutto. Tattha mānaṃ janetīti mānaṃ uppādeti.

@4 cha.Ma. pare 5 cha.Ma. ayaṃ pāṭho na dissati 6 cha.Ma. cakkhādi...

Sattavidhena mānaniddese mānoti uṇṇamo. Atimānoti "jātiādīhi mayā sadiso natthī"ti atikkamitvā maññanavasena uppanno māno. Mānātimānoti "ayaṃ pubbe mayā sadiso, idāni ahaṃ seṭṭho, ayaṃ hīnataro"ti uppanno māno. Ayaṃ bhārātibhāro viya purimaṃ sadisamānaṃ upādāya mānātimāno nāmāti dasasetuṃ "mānātimāno"ti āha. Omānoti hīnamāno. Yo "hīnohamasmī"ti māno nāma vutto, ayaṃ omāno nāma. Api cettha "tvaṃ jātimā, kākajāti viya te jāti. Tvaṃ gottavā, caṇḍālagottaṃ viya te gottaṃ. Tuyhaṃ saro atthi, kākasaro viya te saro"ti evaṃ attānaṃ heṭṭhā katvā pavattanavasena ayaṃ "omāno"ti veditabbo.