Dasa kathāvatthūnīti appicchatādīni dasa vivaṭṭanissitāya, kathāya vatthubhūtāni kāraṇāni. Appicchakathanti ettha appicchoti icchāvirahito aniccho nittaṇho. Ettha hi byañjanaṃ sāvasesaṃ viya, attho pana niravaseso. Na hi khīṇāsavassa aṇumattāpi icchā nāma atthi.

Api cettha atricchatā pāpicchatā mahicchatā appicchatāti ayaṃ bhedo veditabbo:- tattha sakalābhe atittatāya paralābhapatthanā atricchatā nāma, tāya samannāgatassa ekabhājane pakkapūvopi attano patte pakkhitto na supakko viya khuddako viya ca khāyati, sveva pana parassa patte pakkhitto supakko viya mahanto viya ca khāyati. Asantaguṇasambhāvanatā pana paṭiggahaṇe ca amattaññutā pāpicchatā nāma, sā "idhekacco asaddho samāno saddhoti maṃ jano jānātū"tiādinā nayena āgatāyeva. Tāya ca samannāgato puggalo kohaññe patiṭṭhāti. Santaguṇasambhāvanatā pana paṭiggahaṇe ca amattaññutā mahicchatā nāma, sāpi "idhekacco assaddho samāno saddhoti maṃ jano jānātūti icchati, dussīlo samāno sīlavāti maṃ jano jānātū"ti iminā nayena āgatāyeva. Tāya samannāgato puggalo dussantappiyo hoti, vijātamātāpissa cittaṃ gahetuṃ na sakkoti. Tenetaṃ vuccati:-

"aggikkhandho samuddo ca mahiccho cāpi puggalo

sakaṭena paccaye detu tayopete atappiyā"ti.