[153] Idānissa akaraṇavidhiṃ dassento "seyyo na tenā"ti gāthamāha. Tassattho:- tena ca mānena "seyyohan"ti vā "nīcohan"ti vā "sarikkhohan"ti vā na maññeyya. Tehi ca uccākulīnatādīhi guṇehi phuṭṭho anekarūpehi "ahaṃ uccā kulā pabbajito"tiādinā nayena attānaṃ vikappento na tiṭṭheyyāti.

[154] Evaṃ mānappahānavasenapi desetvā idāni sabbakilesūpasamavasena dasetuṃ "ajjhattamevā"ti gāthamāha. Tattha ajjhattameva upasameti attaniyeva rāgādisabbakilese upasameyya. Na aññato bhikkhu santimeseyyāti ṭhapetvā ca satipaṭṭhānādīni aññena upāyena santiṃ na pariyeseyya. Kuto nirattaṃ vāti nirattaṃ kutoyeva.

Na eseyyāti sīlabbatādīhi na maggeyya. Na gaveseyyāti na olokeyya. Na pariyeseyyāti punappunaṃ na ikkheyya.