@3 cha.Ma. mattaṃ sa 4 ka. paṭiggahaṇe ca

Dvīhi kāraṇehi mattaṃ jāneyyāti dvīhi bhāgehi pamāṇaṃ jāneyya. Paṭiggahaṇato vāti parehi dīyamānaggahaṇakālato vā. Paribhogato vāti paribhuñjanakālato vā. Thokepi dīyamāneti appakepi dīyamāne. Kulānudayāyāti kulānaṃ anudayatāya. Kulānurakkhāyāti kulānaṃ anurakkhaṇatthāya. Paṭiggaṇhātīti thokampi gaṇhāti. Bahukepi dīyamāneti anappakepi dīyamāne. Kāyaparihārikaṃ cīvaraṃ paṭiggaṇhātīti ettha kāyaṃ pariharati posetīti kāyaparihārikaṃ. Kucchiparihārikanti kucchiṃ pariharati posetīti kucchiparihārikaṃ. Itarītarappaccayasantosena samannāgatassa bhikkhuno aṭṭha parikkhārā vaṭṭanti tīṇi cīvarāni patto dantakaṭṭhacchedanavāsi ekā sūci kāyabandhanaṃ parissāvananti. Vuttampi cetaṃ:-

"ticīvarañca patto ca vāsi sūci ca bandhanaṃ

parissāvanena aṭṭhete yuttayogassa bhikkhuno"ti.