{๖๘๒} ทุติเย ฯ วรภณฺฑนฺติ มุตฺตามณิเวฬุริยาทิมหคฺฆภณฺฑํ ฯ

{๖๘๓} อนปโลเกตฺวาติ อนาปุจฺฉิตฺวา ฯ คณํ วาติ มลฺลคณภทฺทิปุตฺตคณาทิกํ ฯ ปูคนฺติ ธมฺมคณํ ฯ เสนินฺติ คนฺธิกเสนีทุสฺสิกเสนีอาทิกํ ฯ ยตฺถ ยตฺถ หิ ราชาโน คณาทีนํ คามนิคเม นิยฺยาเทนฺติ ตุมฺเหว เอตฺถ อนุสาสถาติ ตตฺถ ตตฺถ เตเอว อิสฺสรา โหนฺติ ฯ ตสฺมา เต สนฺธาย อิทํ วุตฺตํ ฯ เอตฺถ จ ราชานํ วา คณาทิเก วา อาปุจฺฉิตฺวาปิ ภิกฺขุนีสงฺโฆ อาปุจฺฉิตพฺโพว ฯ ฐเปตฺวา กปฺปนฺติ ติตฺถิเยสุ วา อญฺญภิกฺขุนีสุ วา ปพฺพชิตปุพฺพํ กปฺปคติกํ ฐเปตฺวา ฯ เสสํ อุตฺตานเมว ฯ โจรีวุฏฺฐาปนสมุฏฐานํ เกนจิ กรณีเยน ปกฺกนฺตาสุ ภิกฺขุนีสุ อคนฺตฺวา ขณฺฑสีมํ ยถานิสินฺนฏฺฐาเนเยว อตฺตโน นิสฺสิตกปริสาย สทฺธึ วุฏฺฐาเปนฺติยา วาจาจิตฺตโต สมุฏฺฐาติ ขณฺฑสีมํ วา นทึ วา คนฺตฺวา วุฏฺฐาเปนฺติยา กายวาจาจิตฺตโต สมุฏฺฐาติ อนาปุจฺฉาวุฏฺฐาปนวเสน กิริยากิริยํ สญฺญาวิโมกฺขํ สจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ

ทุติยสิกฺขาปทํ ฯ