{๖๖๐} อุพฺภกฺขกนฺติ อกฺขกานํ อุปริ ฯ อโธชานุมณฺฑลนฺติ ชานุมณฺฑลานํ เหฏฺฐา ฯ เอตฺถ จ อโธกุปฺปรมฺปิ อโธชานุมณฺฑเลเนว สงฺคหิตํ ฯ {๖๖๒} เอกโต อวสฺสุเตติ เอตฺถ กิญฺจาปิ เอกโตติ อวิเสเสน วุตฺตํ ตถาปิ ภิกฺขุนิยาเอว อวสฺสเว สติ อยํ อาปตฺติเภโท วุตฺโตติ เวทิตพฺโพ ฯ ตตฺรายํ อาทิโต ปฏฺฐาย วินิจฺฉโย ฯ ภิกฺขุนี กายสํสคฺคราเคน อวสฺสุตา ปุริโสปิ ตเถว อธกฺขเก อุพฺภชานุมณฺฑเล กายปฺปเทเส กายสํสคฺคสาทิยเน สติ ภิกฺขุนิยา ปาราชิกํ ฯ ภิกฺขุนิยา กายสํสคฺคราโค ปุริสสฺส เมถุนราโค วา เคหสิตปฺเปมํ วา สุทฺธจิตฺตํ วา โหตุ ถุลฺลจฺจยเมว ฯ ภิกฺขุนินา เมถุนราโค ปุริสสฺส กายสํสคฺคราโค วา เมถุนราโค วา เคหสิตปฺเปมํ วา สุทฺธจิตฺตํ วา โหตุ ทุกฺกฏํ ฯ ภิกฺขุนิยา เคหสิตปฺเปมํ ปุริสสฺส วุตฺเตสุ จตูสุ ยํ วา ตํ วา โหตุ ทุกฺกฏเมว ฯ ภิกฺขุนิยา สุทฺธจิตฺตํ ปุริสสฺส วุตฺเตสุ จตูสุ ยํ วา ตํ วา โหตุ อนาปตฺติ ฯ สเจ ปน ภิกฺขุ เจว โหติ ภิกฺขุนี จ อุภินฺนํ กายสํสคฺคราโค ภิกฺขุสฺส สงฺฆาทิเสโส ภิกฺขุนิยา ปาราชิกํ ฯ ภิกฺขุนิยา กายสํสคฺคราโค ภิกฺขุสฺส เมถุนราโค วา เคหสิตปฺเปมํ วา ภิกฺขุนิยา ถุลฺลจฺจยํ ภิกฺขุสฺส ทุกฺกฏํ ฯ อุภินฺนํ เมถุนราโค วา เคหสิตปฺเปมํ วา อุภินฺนํปิ ทุกฺกฏเมว ฯ ยสฺส ยตฺถ สุทฺธจิตฺตํ ตสฺส ตตฺถ อนาปตฺติ ฯ อุภินฺนํปิ สุทฺธจิตฺตํ อุภินฺนํปิ อนาปตฺติ ฯ {๖๖๓} อนาปตฺติ อสญฺจิจฺจาติ อาทีสุ วิรชฺฌิตฺวา วา อามสนฺติยา อญฺญาวิหิตาย วา อยํ ปุริโส วา อิตฺถี วาติ อชานนฺติยา วา เตน ผุฏฺฐายปิ ตํ ผสสํ อสาทิยนฺติยา วา อามสเนปิ สติ อนาปตฺติ ฯ เสสํ สพฺพตฺถ อุตฺตานเมว ฯ ปฐมปาราชิกสมุฏฺฐานํ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ อกุสลจิตฺตํ ทฺวิเวทนนฺติ ฯ

ปฐมปาราชิกสิกฺขาปทํ ฯ